Անկեղծ եմ ասում, շարժասանդուղքները խափանվել են. խոսնակ

Այսօր առավոտյան հայտնի դարձավ, որ  Երևանի մետրոպոլիտենի Բաղրամյան կայարանի շարժասանդուղքների չնախատեսված տեխնիկական խափանում է եղել։ Հանգամանքը ֆեյսբուքյան օգտատերեի կողմից լայնորեն քննարկվեց. բանն այն է, որ շատերը պարզապես չհավատացին «խափանման» հանգամանքին և կատարվածը կապեցին ՌԴ նախագահ Վլադիմիր Պուտինի այցի հետ:

ԼՈՒՐԵՐ․com-ի թղթակիցի հետ զրույցում Մետրոպոլիտենի մամուլի խոսնակ Տաթևիկ Խաչատրյանն ասաց, որ  Բաղրամյան կայարանի շարժասանդուղքների խափանումը տեղի է ունեցել այսօր, ժամը 11։15, իսկ երկրորդ շարժասանդուղքը խափանվել է ժամը11։24-ին։ Տեխնիկական խափանման հիմնական խնդիրը եղել է շարժասանդուղքները սնուցող մուտքային վահանակի մեջ։ Հենց սրա արդյունքում մի քանի րոպեների ընթացքում 3 շարժասանդուղներն էլ դադարել են աշխատել:

Ըստ Խաչատրյանի՝ այս պահին 3 շարժասանդուղքներում էլ լարում չկա։ Մասնագետների խումբն աշխատանքներ է տանում խափանումը վերականգնելու համար։

Մեր այն հարցին, թե երբ կվերականգնվեն կայարանի աշխատանքները՝ մամուլի խոսնակը դժվարացավ պատասխանել․«Խնդիրը կարգավորելու պես՝ հավելյալ կտեղեկացվի»,- ասաց  նա։

Հարցին, թե կայարանի աշխատանքը, հնարավոր է, դադարացվել է անվտանգության նկատառումներից ելնելով, Խաչատրյանը նշեց, որ նման խնդիր չկա ու չի եղել․ «Եթե ԵԱՏՄ ընդլայնված նիստի հետ կապված լիներ, պարզապես  կասվեր, որ անվտանգությունից ելնելով է դադարացվել աշխատանքը։ Չէ՞ որ, փողոցների երթևեկությունը հենց այդ տարբերակով էլ դադարեցվում է։ Անկեղծ եմ ասում, հենց այդպես կանեինք, որպեսզի ավելորդ շահարկումների առիթ չդառնայինք»,- խոսքն ամփոփելով ասաց Խաչատրյանը։