ԼՀԿ-ն լքելու վերաբերյալ գրված և ջնջած ստատուսի հետքերով

Երեկ Հանրային կառավարման մասնագետ Սոսի Թաթիկյանն իր ֆեյսբուքյան էջում կատարած գրառմամբ տեղեկացրեց, որ լքում է «Լուսավոր Հայաստան» կուսակցություն: Սակայն, այսօր նկատեցինք, որ նա հեռացրել է գրառումը, ինչը տպավորություն ստեղծեց, որ գուցե Թաթիկյանը մտափոխվել է։ ԼՈՒՐԵՐ․com—ի հետ զրույցում ԱԺ «Լուսավոր Հայաստան» խմբակցության ղեկավար Էդմոն Մարուքյանը նշեց, որ կուսակցությունը 4000 անդամ ունի և աճող օրգանիզմ է՝ որոշ մարդիկ կարող են անդամագրվել, որոշները կարող են դուրս գալ․ «Մեկը կարող է ֆեյսբուքում գրել, մյուսը՝ չգրել։ Թե ինչու է ջնջել գրառումը, չեմ կարող ասել, բայց մեզ տեղեկացրել է, որ անդամությունն ուզում է դադարեցնել, դիմել է միջազգային կառույցներ աշխատանքի համար, ինչն ի գիտություն ենք ընդունել և որևէ խնդիր չենք տեսնում։ Ինչ վերաբերում է կուսակցական հանդիպումներին ու քննարկումներին չմասնակցելուն, ապա նա կուսակցության խորհրդի, կառավարման խորհրդի, վերահսկիչ հանձնաժողովի անդամ չի եղել, կուսակցության սովորական անդամ է եղել, չեմ կարող ասել՝ ինչ քննարկում նկատի ունի։ Նրա անդամագրվելուց հետո համագումար չի եղել, որպեսզի  հրավիրվեր»,- ասաց նա։ 

Հարցին՝ գրառումից տպավորություն էր, թե կուսակցությունից նեղվածություն ունի, Մարուքյանն ասաց, որ նման թեմայով խոսակցություն իրենց միջև չի եղել։

ԼՀԿ մամուլի խոսնակ Արեն Պետունցն էլ վստահեցրեց, որ կուսակցության ներսում նրա հետ տարաձայնություններ չեն եղել․ «Կուսակցական ժողովներն ու նիստերը լինում են ֆիքսված, հատուկ հրավերք չի լինում։ Նրա գրառման ընդհանուր միտքն այն էր, որ անցնում է այլ աշխատանքի, և նոր աշխատանքի բնույթը ենթադրելու է խորհրդարանական և արտախորհրդարանական ուժերի հետ դրական հարաբերություններ ունենալ»,- նշեց Պետունցը։

Սոսի Թաթիկյանը մեզ հետ զրույցում փոխանցեց, որ անցնում է այլ աշխատանքի և որևէ հարցազրույց տալու իրավունք չի ունենալու այլևս․ «Իմ բոլոր հանրային հարցազրույցները կավարտվեն։ Ես արդեն այդ փոստը ջնջել եմ, քանի որ ես այդքան կարևոր մարդ չեմ և մեդիայի իմ հանդեպ այդպիսի հետաքրքրությունը չեմ հասկանում և դա կարող է ինձ համար լուրջ խնդիրներ հարուցել»,- ասաց նա՝ չցանկանալով մանրամասնել տեղի ունեցածը։ 

Հիշեցնենք, որ նախորդ ամսվա սկզբին՝ սեպտեմբերի 6-ին, ԱԺ պատգամավոր Արման Բաբաջանյանը հայտարարեց «Լուսավոր Հայաստան» խմբակցությունից դուրս գալու որոշման մասին՝ հայտնելով, որ որոշ պատճառներ ու գործոններ այլևս անհամատեղելի են դարձնում իր աշխատանքը խմբակցության հետ։ Սակայն նաչհրաժարվեց պատգամավորական մանդատից և իր քաղաքական գործունեությունը շարունակում է որպես անկախ պատգամավոր։