Աշխատանքից ազատված բժշկի որդին հայհոյել է կենտրոնի տնօրենին, ինչից հետո ծեծի է ենթարկվել

Այսօր տհաճ միջադեպ է տեղի ունեցել առողջապահության նախարարության ենթակայությամբ գործող «Վ.Ա. Ֆանարջյանի անվան Ուռուցքաբանության ազգային կենտրոնում»:

Տնօրենի ժամանակավոր պաշտոնակատար Նարեկ Մանուկյանը մի քանի օր առաջ աշխատակիցներից մեկին, ըստ կենտրոնի հաղորդագրության, իրավական հիմքով, ազատել է աշխատանքից։ Այսօր վերջինիս որդին, որը ևս կենտրոնի աշխատակիցներից է` որոշել է հաշիվ պահանջել նման որոշման համար:

Վերջինս ներխուժել է տնօրենի աշխատասենյակ` վիրավորանքներ ու հայհոյանքներ ուղղել Նարեկ Մանուկյանի հասցեին, որից հետո փորձել է հարվածել նրան: Աշխատակիցը չի լսել նաև տնօրենի հորդորը` հարցը իրավական ճանապարհով պարզելու վերաբերյալ:

Վիճաբանության կապակցությամբ հրավիրվել է ոստիկանություն:

Ըստ տեղեկությունների՝ ծեծկռտուքի հետևանքով Վ. Համբարձումյանը քթի մասում վնասվածքներ է ստացել։