Բողոք NBC-ին՝ օլիմպիադայի բացմանը Հայաստանը չներկայացնելու համար

ԱՄՆ-ում Օլիմպիական խաղերի ցուցադրման բացառիկ իրավունք ունեցող NBC հեռուստաընկերությունը քննադատության է ենթարկվել ամերիկահայ հեռուստադիտողների կողմից: ՀՅԴ Ամերիկայի Հայ Դատի գրասենյակի հաղորդմամբ՝ հուլիսի 27-ի օլիմպիադայի բացման արարողության ժամանակ պատշաճ կերպով ներկայացնելով մյուս բոլոր մարզական պատվիրակություններին` Հայաստանի դեպքում բավարարվել են մեկ նախադասությամբ` «Հայաստանն է քայլում»:

ՀՅԴ Հայ դատի հանձնախմբի ատենապետ Քեն Հաչիկյանը նամակով իր բողոքն է հայտնել NBC հեռուստաընկերության տնօրեն Ստեֆան Բրուկեին: Նամակում մասնավորապես նշված է. «NBC-ի նման վերաբերմունքը Հայաստանին անհարգալից է ոչ միայն Հայաստանի քաղաքացիների, այլև ավելի քան 1.5 միլիոն ամերիկահայ Սփյուռքի համար: Նման գործողությունները թուլացնում են հեռուստալիքի եւ նրա լսարանի կապը: Կոչ ենք անում բացատրել և ներողություն խնդրել հայկական թիմից թողարկման թերությունների համար և խոստանալ պատշաճ կերպով լուսաբանել Հայաստանի և նրա մարզիկների խաղերն օլիմպիադայի վերաբերյալ մյուս թողարկումներում»:

NBC-ին ուղղված բողոքի արշավ է նախաձեռնվել նաև Ֆեյսբուք սոցիալական ցանցում։