Ո՞ւմ են ծառայում Մեդվեդևն ու Պուտինը

 Ռուսաստանի 5 քաղաքացիներից 4-ի կարծիքով ՌԴ նախագահ Վլադիմիր Պուտինը ոչ թե իրենց շահերն է ներկայացնում, այլ ծառայում է ուժային կառույցներին, օլիգարխներին ու բյուրոկրատներին: Այսպիսի արդյունք է արձանագրվել «Լևադա-կենտրոն»-ի անցկացրած նոր հարցման ժամանակ։ Այդ մասին հաղորդում է РБК-ն:

Այսպիսով, վերջին մեկուկես տարվա ընթացքում (սկսած 2011 թ.-ի հունվարից) զգալիորեն ավելացել է այն ռուսաստանցիների թիվը, ովքեր կարծում են, որ Պուտինը ներկայացնում է ուժային կառույցների շահերը (31-ից աճել է մինչև 43 տոկոս), երկրորդ տեղում, ըստ հարցվածների, հայտնվել են օլիգարխները, բանկիրները և խոշոր գործարարները (26-ից` 39 տոկոս), երրորդ տեղում են պաշտոնյաները, բյուրոկրատները (24-ից` 32 տոկոս): Նշանակալիորեն նվազել է այն մարդկանց թիվը (26-ից մինչև 21 տոկոս), ովքեր կարծում են, որ Պուտինը պաշտպանում է միջին դասի, այդ թվում՝ աշխատավորների և ծառայողների շահերը:

«Նորացված Պուտինն այն Պուտինն է, ով որոշակիորեն բռնել է պետական բյուրոկրատիայի, խոշոր գործատուների գիծը, այն մարդկանց, որոնց մոտ են կենտրոնացած հիմնական ռեսուրսները»,-ասել է «Լևադա-կենտրոնի» ներկայացուցիչը:

Ինչ վերաբերում է վարչապետ Դմիտրի Մեդվեդևին, ապա նա ընկալվում է որպես մի անձ, ով ներկայացնում է «Պուտինի մերձակա շրջապատի» շահերը (այսպես է կարծում հարցվածների 39 տոկոսը): Ավելի մեծ թվով ռուսներ համոզված են, որ Մեդվեդևը ներկայացնում է ուժային կառույցների շահերը (25 տոկոս), և ավելի քիչ մարդիկ կարծում են, որ նա միջին խավի շահերն է պաշտպանում (15 տոկոս):

Այնուհանդերձ, Վլադիմիր Պուտինը նախագահական ընտրություններին ստացել էր ձայների շուրջ 60 տոկոսը, իսկ ընտրություններից հետո ընդդիմության բողոքի ալիքը անկում էր ապրել: Բացի այդ, չնայած Մոսկվայում և Սանկտ-Պետերբուրգում   բողոքի բազմաթիվ  ցույցերին, իրավիճակը երկու քաղաքներում էլ հունից դուրս չեկավ։

«Այն, որ Պուտինն ունեցավ մոտավորապես 60 տոկոսի աջակցությունը, շատ հետաքրքիր երևույթ է։ Այն ցույց է տալիս, որ մարդիկ չեն տեսնում այլընտրանք», - ասում է կենտրոնի ներկայացուցիչը։