Եվրոպայում տեղի է ունեցել Վահե Ավետյանի հիշատակին նվիրված պատարագ

Oգոստոսի 5-ին Վիեննայի Հայկական եկեղեցում մատուցվել է պատարագ Վահե Ավետյանի մահվան քառասունքի կապակցությամբ' պատվիրված Եվրոպայի Հայկական Միությունների Ֆորումի նախագահ Աշոտ Գրիգորյանի կողմից:

Տեղեկացվում է, որ համանման պատարագ արդեն մատուցվել էր Եվրոպայի մի շարք մայրաքաղաքներում: Պրագայում քառասունքի հոգեհանգիստը մատուցվել է հոգևոր առաջնորդ, վարդապետ Հայր Բարսեղ Պիլավչյանի կողմից, որը մասնակից էր նաև Բրատիսլավայում' հայտնի խաչքարի մոտ կայացած մոմավառության արարողությանը: Մոմավառության ակցիա կայացել է նաև Բրյուսելում, Լոնդոնում, Փարիզում, Ֆրանկֆուրտում, Բեռլինում և այլուր:

Վիեննայի եկեղեցում մատուցված պատարագը վարել է Միջին Եվրոպայի երկրների հայ հոգևոր առաջնորդ Սրբազան Հայկազունը, որն իր խոսքում դատապարտել է Հայաստանում տեղ գտած բարքերը և կոչով դիմել ժողովրդին' սթափվելու և քաղաքակիրթ աշխարհից ետ չմնալու համար պայքարի քաղաքակիրթ մեթոդներն ընդօրինակելու:

Սրբազանը հույս է հայտնել, որ Վահե Ավետյանի մահվան իսկական մեղավորները խստագույնս կպատժվեն, քանի որ հսկայական ժողովրդական զանգվածներ ակտիվ մասնակցում են օրեցօր ուժգնացող շարժմանը, որի արդյունքում դրական տեղաշարժներ են սպասվում:

ԵՀՄՖ-ի նախագահ Աշոտ Գրիգորյանը մոմավառության միջոցառման ժամանակ հայտարարել է.«Կամ ժողովուրդը հաղթելու է քրեաօլիգարխիկ համակարգին և կատարելու է իշխանափոխություն, կամ կատարվելու է ամենասարսափելին. երկիրը առավել տեմպերով է հայաթափվելու, Հայաստանը մնալու է անպաշտպան այսօրվա մարտահրավերների դեմ դիմաց և անկարող՝ կասեցնելու թուրք-ադրբեջանական ագրեսիան»:

Աշոտ Գրիգորյանն ասել է, թե համակարգի կործանման դեպքում սպասվում է հակառակ գործընթացը. արտերկրի հայությունը վերադառնալու է Հայաստան և մեծ ոգևորությամբ սկսվելու է վերածննդի շրջանը, որին ձգտում է ողջ համաշխարհային հայությունը:

«Քրեաօլիգարխիկ համակարգը Հայաստանում հոգեվարք է ապրում: Իր արմատներով սերտաճած լինելով իշխող կուսակցությանը օլիգարխիկ համակարգը դարձել է տնտեսության զարգացման արգելակ, որը զրկել է Հայաստանի տնտեսությունը որևէ ապագայից: Այն ազդում է նաև Հայաստանի արտաքին տնտեսական և քաղաքական կապերի զարգացման վրա և համակարգային փոփոխություններ, անկասկած, երազում է նաև կատարել երկրի ղեկավարությունը»,– ասել է նա:

Աշոտ Գրիգորյանը նաև նշել է, որ այսօր Հայաստանում զարգացող և թափ առնող քաղաքական տարբեր շարժումները նպաստում են համակարգային փոփոխություններ կատարելուն և նրանց հետ համագործակցելու դեպքում կարելի է գտնել առանց ցնցումների Հայաստանը քրեաօլիգարխիկ համակարգից ազատելու ուղին:

«Մենք հավատում ենք, որ մեր երկիրն ունենալու է վառ ապագա, և կոչ ենք անում բոլոր առողջ ուժերին միավորվելու և հաղթելու' փոխելով Հայաստանի քրեաօլիգարխիկ իշխանությունների համակարգը հանուն մեր սերունդների քաղաքակիրթ գոյատևման»,– նշել է Աշոտ Գրիգորյանը: