Քաղաքացիական պատերազմի շեմին ենք կանգնած, ուղղակի ժամանակի հարց է. Սարգիս Գրիգորյան (տեսանյութ)
ՀասարակությունԴերասան Սարգիս Գրիգորյանը 168TV-ի եթերում պարզաբանել է, թե ինչու է միացել մշակութային մի խումբ գործիչների՝ Ռոբերտ Քոչարյանի խափանման միջոցը փոխելու վերաբերյալ հայտարարությանը. «Ամենաքիչը 6 կետ կա, որ ինձ համար համոզիչ էր: Առաջին՝ մեր երկրի հեղինակությունը, որ մենք հենց այնպիսի մարդու չենք դատում, այլ նա երկու հայկական պետությունների նախագահն է եղել, երկրորդ՝ Արցախի հերոս, երրորդ՝ ռազմական ու պատերազմական ծանրակշիռ ուղի անցած անհատ: Չորրորդ՝ ինձ համար շատ կարևոր էր, որ մի մարդ, ում վկայի կարգավիճակով կանչեցին Հայաստան, ու համոզված եմ, որ Ռոբերտ Քոչարյանը տեղյակ էր, որ շատ հեշտ է վկայի կարգավիճակից մեղադրյալի կարգավիճակի անցնելը, բայց մարդը եկավ՝ պարզ ճակատով փորձեց պատասխանել հարցերին: Հաջորդը՝ Արցախի երկու նախագահները՝ Բակո Սահակյանն ու Արկադի Ղուկասյանը, տվեցին իրենց երաշխիքը, որ Ռոբերտ Քոչարյանը չի լքի երկիրը կամ ինչ-ինչ քայլեր չի անի: Եվ ամենակարևորը՝ հումանիզմը: Այս կարևոր քայլերն ինձ համար շատ ծանրակշիռ փաստեր էին, որ ես ստորագրեմ այդ փաստաթղթի տակ: Թող դատը գնա, եթե մեղավոր կճանաչվի, ի սեր Աստծո, թող կրի իր պատիժը: Դա միայն Ռոբերտ Քոչարյանին չի վերաբերում, այլ բոլորին՝ ով մեղավոր է՝ պետք է կրի իր պատիժը, դա նորմալ է»,- ասել է նա:
Գրիգորյանը նշել է, որ հայտարարությանը միանալուց հետո, իր և իր ընտանիքի հանդեպ որոշակի գործողություններ են սկսել ծավալվել. «Ես կարծում եմ, որ սա անվտանգության լուրջ խնդիր է, որովհետև արդեն չափն ահավոր անցնում են, մտնում են ընտանիքներ, երեխեքիս են գրում…: Տեր Աստված, այնպիսի խոսքեր են գրում, որ մի պահ ուզում էի վեր կենալ, գնալ ԱԱԾ-ի կողքը նստել, ասել՝ ժողովուրդ, հասկանո՞ւմ եք՝ ինչ է կատարվում, մենք խոսում ենք անվտանգությունից, բայց ներսից իրար կեղեքում ենք, իրար «մորթում», ատում ենք: Գիտե՞ք՝ շատ հրաշալի է, երբ ասֆալտը որակով է և լավ ասֆալտ է արած, շատ կարևոր է, երբ մեր զինվորը քաղցած չէ, շատ լավ է, որ էլի ռազմական տեխնիկա ենք ստանում, բայց պետք է սովորենք առաջինը երկրորդայինից տարբերել:
Ես ամեն ինչ իմ ընտանիքից եմ սկսում. Իմ ընտանիքն իմ պետությունն է, ես էլ իմ ընտանիքի վարչապետն եմ, եթե այս քայլն իմ ընտանիքում անեմ, դա լա՞վ է, թե՞ վատ, ու նոր դա ես վերածում եմ ընդհանուր պետության: Եթե քո տան պատերը ոսկուց են, ամեն ինչ հրաշալի է կառուցված, սառնարանդ լիքն է, բայց տանդ կա ատելություն, դավաճանություն, սիրո բացարձակ բացակայություն, ուրեմն այդ ոսկուց պատերը ոչ մեկի աչքին չեն գալու, այդ ասֆալտը, այդ ամենը ոչ մեկիս պետք չէ, եթե մեր երկրում մեկս մյուսին ատում ենք, հայը հային կեղեքում է: Քաղաքացիական պատերազմի շեմին ենք կանգնած, ուղղակի ժամանակի հարց է, եթե այս ճանապարհով գնանք»,- նշել է դերասանը:
Մանրամասները՝ տեսանյութում:
ՈՒՂԻՂ ԵԹԵՐ
Ամենադիտված 
Կյանքից հեռացել է Տիգրան Ղազարյանը
