Առողջապահության նախարարությունը հանդես է եկել տոնական օրերին պոլիկլինիկաների աշխատելու առաջարկով

Հայաստանում սուր շնչառական հիվանդություններով պայմանավորված անհանգստացնող իրավիճակ առայժմ չկա: Հրավիրված ասուլիսում ՀՀ ԱՆ հիվանդությունների վերահսկման և կանխարգելման ազգային կենտրոնի հատուկ վտանգավոր և օդակաթիլային վարակների համաճարակաբանության բաժնի պետ Լիանա Թորոսյանը նշեց, որ ներկայում սեզոնին բնորոշ իրավիճակ է:

«Վերջին տվյալները ներկայացնեմ: Դեկտեմբերի 26-ի տվյալներով սուր շնչառական վարակներով ամբողջ հանրապետությունում պոլիկլինիկաներին դիմել է 792 մարդ: Այս ցուցանիշը նախորդ տարիների համեմատ նույնիսկ նվազել է: Նույն իրավիճակը նկատում ենք հոսպիտալացումների շրջանում: Նույն օրվա դրությամբ ամբողջ հանրապետությունում հոսպիտալացումների թիվը կազմում է 525»,-ասաց Լիանա Թորոսյանը:

Արձանագրված դեպքերի 80-90 տոկոսը կազմում են 0-18 տարեկանները: Այս կառուցվածքում առավել բարձր թիրախային խումբ են համարվում 0-5 տարեկան երեխաները: Մասնագետը նշեց, թե մտավախություն կա, որ տոնական օրերից հետո սուր շնչառական վարակների մի փոքր ակտիվացում կլինի:

«Սովորական օրերին, երբ մենք վատառողջ ենք լինում, մնում ենք տանը, հյուր չենք գնում, հյուր չենք ընդունում: Տոնական օրերին իրավիճակը բոլորովին այլ է: Այս հյուրաշատ  շրջանում սուր շնչառական վարակը միմյանց փոխանցելու ռիսկը մեծանում է: Հորդորում ենք ամեն դեպքում վատառողջ լինելու պարագայում մնալ տանը»,-ասաց Լիանա Թորոսյանը:

Մասնագետը հորդորում է ինքնաբուժությամբ չզբաղվել, անտեղի հակաբիոտիկներ չընդունել, անհրաժեշտության դեպքում դիմել բժշկի: Առողջապահության նախարարությունն առաջարկությամբ հանդես է եկել, որ տոնական օրերին պոլիկլինիկաներն աշխատեն: