Վարորդական իրավունքի կասեցումից հետո երթևեկած վարորդները պատասխանատվության կենթարկվեն

ՀՀ ճանապարհային ոստիկանության պետի տեղակալ Արման Չիլինգարյանն այսօր մանրամասներ ներկայացրեց 2020թ. հունվարի 1-ից ուժի մեջ մտնող տուգանային միավորների համակարգի վերաբերյալ:

Նրա խոսքով՝ բալային համակարգի ներդրումը պայմանավորված է 7 օրենսդրական ակտերի ընդունմամբ, մասնավորապես, Վարչական իրավախախտումների վերաբերյալ ՀՀ օրենսգրքում, Ճանապարհային երթևեկության անվտանգության ապահովման մասին ՀՀ օրենքում, Տեսանկարահանող և լուսանկարահանող սարքերով հայտնաբերված իրավախախտումների գործերով վարչական վարույթի առանձնահատկությունների մասին օրենքում և այլ օրենքներում կատարված փոփոխությունների օրենսդրական փաթեթն է:

«Օրենքի ուժի մեջ մտնելու պահին յուրաքանչյուր անձ, ով ունի տրանսպորտային միջոցներ վարելու իրավունք, այսինքն՝ վարորդական վկայական ստանում է 9 տուգանային միավոր՝ 9 բալ: 1 տարվա ընթացքում այդ բալերը սպառելու դեպքում նրա տրանսպորտային միջոց վարելու իրավունքը կասեցվում է 6 ամիս ժամկետով: 6 ամիս ժամկետի կեսը լրանալուց հետո, այդ  անձը կստանա օրենքի ուժով իրավունք՝ հանձնել միայն տեսական քննություն և վերականգնել իր վարելու իրավունքը: Եթե չի հանձնում տեսական քննություն, ապա 6 ամիս ժամկետը լրանալուց հետո օրենքի ուժով  առանց որևէ քննություն ահնձնելու վերականգնվում է նրա վարելու իրավունքը,  կասեցումը վերականգնելու պահին վարորդը ստանում է ևս 9 բալ: 1 տարվա ընթացքում երկրորդ անգամ 9 բալը սպառելու պարագայում արդեն անձը զրկվում է տրանսպորտային միջոցներ վարելու իրավունքից 1 տարի ժամկետում: Այս դեպքում 6 ամսվա կեսին հնարավոր չէ վերականգնել վարորդական իրավունքը, իսկ 6  ամիս անց վերականգնելու համար անձը պետք է հանձնի ամբողջական քննություն»:

Ըստ օրենքի՝ վարորդները միավորները վերականգնելու հնարավորություն կունենան, դրա համար կպահանջվի տեսական քննություն հանձնել: Չիլինգարյանի պնդմամբ՝ տուգանային միավորներ նախատեսված են այն իրավախախտումների համար, որոնց կատարմամբ առավելապես պայմանավորվում են հատկապես ծանր հետևանքով ճանապարհատրանսպորտային պատահարները, կամ այն պատահարներն են, որոնց հետևանքով ունենում ենք խցանումներ:

Օրենսդրական փաթեթով փոփոխվել են որպես տուգանք կիրառվող սանկցիաների չափերը, որոնք նվազել են գրեթե 50 տոկոսով: 

Օրենքը նախատեսում է նաև քրեական պատասխանատվություն մի շարք դեպքերում.

«Քրեական պատասխանատվության կենթարկվեն այն վարորդները, ովքեր կերթևեկեն վարորդական իրավունքի կասեցումից հետո: Քրեական պատասխանատվության կենթարկվեն նաև նրանք, ովքեր չունեն վարորդական իրավունք և  1 տարվա ընթացքում 2-րդ անգամ նմանատիպ արարք կկատարեն: Այսինքն՝ առաջին անգամ վարորդական իրավունք չունենալու դեպքում կենթարկվեն վարչական տույժի, ապա՝ քրեական պատասխանատվության»: