Մեզ համար ավարտվում է գործող իշխանությանն աջակցելու փուլը. Վարուժան Ավետիսյան

Ամփոփելով 2019 թվականը` ափսոսանքով ստիպված ենք փաստել, որ  հեղափոխությունը, կամ ավելի ստույգ` համակարգային փոփոխությունների գործընթացը ձախողման եզրին է: Այս մասին այսօր հրավիրված ասուլիսում հայտարարեց «Սասնա ծռեր» կուսակցության քարտուղարության համակարգող Վարուժան Ավետիսյանը։ 

Նրա խոսքով` ՀՀ-ն Արցախի հետ միասին, մնում է համակարգային ճգնաժամի մեջ: Ճգնաժամը շարունակվում է պետության՝ որպես համակարգի բոլոր 4 հիմնական բաղադրիչների՝ պետական կառավարման, արտաքին հարաբերությունների, սոցիալ-տնտեսական և սոցիալ-մշակութային մասով:

«Ճգնաժամի համալիր բացասական ազդեցության պատճառով աղետալի ընթացքի մեջ են մնում Արցախի խնդիրը, արտաքին անվտանգությունը, ժողովրդագրությունը, կենսամակարդակը, արդարությունը և շրջակա միջավայրը: Այլևս ակնհայտ է, որ գործող իշխանությունը չունի համակարգային փոփոխություններ կատարելու բավարար կամք և կարողություն: Պետության ղեկը ստանձնելու օրվանից մինչև այժմ, մեկուկես տարվա ընթացքում գործող իշխանությունն անտեսել կամ իմաստազրկել ու զրոյացրել է համակարգային փոփոխությունների վերաբերյալ մեր և այլ ուժերի ու գործիչների բոլոր առաջարկություններն ու նախաձեռնությունները»,- ասաց Վարուժան Ավետիսյանը:

Նրա խոսքով՝ ժամանակն է, որ սևերի հետ համեմատության մեջ իր համար հարմարավետության «զոնա» ստեղծած և իրեն որպես սպիտակ երևակայող  ներկայիս իշխանությունն ունենա իրական այլընտրանք և հակակշիռ՝  իրական սպիտակների բևեռ: Ավետիսյանն ասաց նաև, որ կենսական անհրաժեշտություն ունեցող  նման  բևեռի ձևավորումն  իրենք պատկերացնում են ազգային ժողովրդավարական ուժերի և գործիչների հնարավորինս լայն համախմբմամբ:

«Հանուն պետության կայացման, սահմանադրականության հաստատման և ժողովրդավարության երաշխավորման ստեղծվելիք ազգային ժողովրդավարական բևեռի խնդիրը պետք է դառնա համակարգային փոփոխություններն անշրջելի հունի մեջ դնելը: Երկրորդ կարծիք լինել չի կարող, որ Հայաստանը պետք է չընկնի  իրարահաջորդ  հեղաշրջումների արատավոր շրջանի մեջ: Նման գործընթաց կարող է սկսվել  ռևանշի կամ ևս մեկ ժողովրդական ընդվզման պարագայում»,- նշեց Վարուժան Ավետիսյանը:

Նա ընդգծեց, որ որպես անցնցում տարբերակ մնում է ներկայիս հեղափոխությունն  ավարտին հասցնելը և ըստ նրա՝ այդ տարբերակի պարագայում արտահերթ ընտրություններին պետք է նախորդի հեղափոխական ուժերից կազմված ազգային համաձայնության կառավարության՝ իշխանության անցումային ծրագրով կոշտ կառավարման շրջանը: «Վերոհիշյալի հաշվառմամբ արձանագրում ենք, որ մեզ համար ավարտվում է գործող իշխանությանն աջակցողի դերում հանդես գալու փուլը: Մենք 2020 թվական ենք մտնում որպես համակարգային փոփոխությունների ձգտող, արմատական ընդդիմություն, որդեգրելով իշխանությանը պահանջներ ներկայացնող և իրավական միջոցներով դրանց կատարմանը ձգտող քաղաքական ուժի դիրք»,- եզրափակեց Վարուժան Ավետիսյանը: