Սփյուռքի նախարարությունը մամուլ գոնե ընթերցո՞ւմ է

Այսօր առավոտյան սիրիահայերից Lurer.com-ի ստացած ահազանգերի հետ կապված, փորձեցինք Սիրայում հայերի վիճակի մասին պաշտոնական արձագանք ստանալ։

Հիշեցնենք՝ թե՛ Հալեպից, թե՛ Դամասկոսից սիրիահայերը գուժում էին մարտերի թեժացման և հայկական թաղամասեր հասնելու մասին։

ԱԳՆ մամուլի խոսնակ Տիգրան Բալայանը նախարարի հետ գործուղման մեջ է։ Այդուհանդերձ, հաղորդագրությամբ նա փոխանցեց, որ փոխնախարարի խոսքերը երկու շաբաթ կմնան որպես ԱԳՆ պաշտոնական տեսակետ։ Հավանաբար, նկատի է առնվում Սերգեյ Մանասյանի այն հայտարարությունը, որի համաձայն դեսպանատան փակումը բացառվում է։

Սիրիայում վերջին իրադարձությունների մասին տեղեկությունները ճշտելու համար Lurer.com-ը կապ հաստատեց Սփյուռքի նախարարությունում սիրիահայության հետ տարվող աշխատանքների համակարգող հանձնաժողովի նախագահ Ֆիրդուս Զաքարյանի հետ, ով մեզ ասաց. «Ես հստակ որևէ բան չեմ կարող ասել, ես հիմա ինֆորմացված չեմ»։

Նկատենք, որ մեր զրույցից մի քանի ժամ առաջ արդեն մի քանի լրատվամիջոցներ ահազանգել էին Հալեպի հայկական թաղամասեր մարտերի հասնելու մասին։ Գուցե ժամանակն է մամուլ ընթերցել։

Նելլի Ավետիսյան