Սամվել Ալեքսանյանի քույրը նախկին ջրավազան-կանաչապատ տարածքում բազմաֆունկցիոնալ համալիր է կառուցում. Հետք

Տիգրան Մեծ փողոցի կանաչապատ տարածքը, այնտեղ գտնվող ջրամբարը վերածվում է բազմաֆունկցիոնալ համալիրի։ ԱԺ նախկին պատգամավոր Սամվել Ալեքսանյանի քրոջ՝ Սուսաննա Պետրոսյանի «Պար Սամ եղբայրներ» ընկերությունն այգու տարածքում կառուցում է «Կայզեր» բազմաֆունկցիոնալ համալիր։ Այս մասին հայտնում է Հետքը:

«Պար Սամ եղբայրներ» ընկերությունը հիմնադրվել է 2017 թվականի հունիսին, միակ սեփականատերը Սուսաննա Պետրոսյանն է։ Ընկերության կապիտալը մոտ 3 միլիարդ դրամ է։ Ի դեպ, Պետրոսյանը ՀՀԿ-ից Երևանի ավագանու նախկին անդամ Արթուր Պետրոսյանի մայրն է։

Մոտ 2 ամիս է՝ տարածքում լայնածավալ շինարարական աշխատանքներ են ընթանում։ Նախկին ջրային տարածքը մի քանի տարի է` մետաղաթիթեղյա ցանկապատով առանձնացված էր։

Արխիվային լուսանկարներից երևում է, որ տարածքում նախկինում եղել է ջրավազան, կանաչապատ տարածք՝ նստարաններով։ Տարածքով հոսում է Հրազդան գետի առվակներից մեկը։

Երևանի քաղաքապետարանի՝ տված 2018թ.-ի մարտի 1-ի ճարտարապետահատակագծային առաջադրանքի մեջ նշված է, որ ընկերությանը տրամադրվել է մոտ 1,17 հեկտար տարածք, որտեղ պետք է կառուցվի առևտրի կենտրոնի, հյուրանոցային և գրասենյակային մասնաշենքերից բաղկացած բազմաֆունկցիոնալ համալիր:

Ամիսներ անց՝ հունիսի 12-ին, «Պար Սամ եղբայրներ» ընկերությունը շրջակա միջավայրի նախարարություն է ներկայացրել շրջակա միջավայրի վրա ազդեցության նախնական գնահատման հայտ։ Ըստ որի՝ բազմաֆունկցիոնալ համալիրը կազմված է լինելու հինգ մասնաշենքից: Բոլոր մասնաշենքերը լինելու են եռահարկ, երկու նկուղային հարկերով։

Առաջին հարկում նախատեսված են սուպերմարկետ և տաղավարներ: Երկրորդ հարկում նույնպես կգործեն տաղավարներ, տեղակայված կլինի համալիրի վարչական հատվածը և ծառայողական անձնակազմին հատկացված տարածքները: 

Երկրորդ հարկում գտնվելու է մանկական ժամանցի կենտրոն, դահլիճներ և մանկական առևտրի կենտրոն: Իսկ երրորդ հարկերում՝ սրճարաններ` իրենց սպասարկող օժանդակ սենյակներով: Ըստ շինթույլտվության՝ շինարարությունը պետք է իրականացվի 3 տարվա ընթացքում:

Շրջակա միջավայրի նախարարությունը դրական եզրակացություն է տվել «Պար Սամ ընկերության» ներկայացրած այս հայտին։

Մանրամասները՝ սկզբնաղբյուր կայքում