Հայկ Մարությանը հյուրընկալել է համայնքին աջակցող գործարարներին

Երեւանի քաղաքապետ Հայկ Մարությանը հյուրընկալել է Հայաստանում եւ արտերկրում գործունեություն ծավալող այն ընկերությունների ներկայացուցիչներին ու անհատներին, որոնք իրենց աջակցությունն են ցուցաբերել համայնքին: Շնորհակալություն հայտնելով քաղաքի գործընկերն ու աջակիցը դառնալու համար՝ քաղաքապետ Մարությանը նշել է, որ Երեւանի քաղաքային իշխանությունը որդեգրել է բիզնեսի սոցիալական պատասխանատվության ինստիտուտի խթանման սկզբունքը եւ համոզմունք հայտնել, որ ձեւավորվող այս մշակույթը լինելու է վարակիչ:

«Ձեր կողմից դրված ավանդույթի շնորհիվ վստահաբար այլ գործարարներ եւս միանալու են այս գործին եւ նորից օգնեն քաղաքին: Այս գործը մնայուն է: 30 տարվա մեջ այսպիսի հզորություն եւ այսպիսի նոր չափանիշներով հագեցած տեխնիկա չի ունեցել համայնքը:

Եվ այս գործի հիմքում առաջինները, այսպես ասած, պիոներները դուք եք, եւ ես քաղաքի անունից եւս մեկ անգամ շնորհակալություն եմ հայտնում ձեզ: Դուք մասնակցում եք ձեր քաղաքի կառուցմանը: Եվ շատ բնական է, որ այդ գործին մասնակցում են հենց այն մարդիկ, ովքեր աշխատում եւ արարում են այստեղ»,- նշել է քաղաքապետն ու հավելել, որ քաղաքը կանգնած է բոլոր այն մարդկանց կողքին ովքեր ստեղծող են եւ իրենց հետեւից հետք են թողնում:

Երեւան համայնքի սոցիալ-կենցաղային խնդիրների լուծմանն ակտիվ մասնակցության եւ բարձր սոցիալական պատասխանատվություն ցուցաբերելու համար Երեւանի քաղաքապետը պատվոգրերով եւ շնորհակալագրերով պարգեւատրել է ՀՀ-ում Չինաստանի Ժողովրդական Հանրապետության արտակարգ եւ լիազոր դեսպան ն.գ. Տյան Էրլունին, «Ա․Մ․ Աբրամ Քոնսթրաքշն», «Ալեքս էնդ հոլդինգ», «Ավանգարդ մոթորս», «Բյուրեղ Բնակելի Թաղամաս», «Էյչ Բի Էմ գրուպ», «Ն եւ Ս Քոնսթրաքշն», «Տերյան 5» ընկերություններին, ինչպես նաեւ Հայրապետ Հովհաննիսյանին եւ Սարգիս Խուրշուդյանին: