Այսօր լրանում է ռուս-վրացական պատերազմի չորս տարին

Չորս տարի առաջ այս օրերին սկսվեց ռուս-վրացական պատերազմը: Հարավային Օսիայում ահագնացող ընդհարումների ֆոնին 2008-ի օգոստոսի 8-ին Վրաստանի նախագահ Միխեիլ Սահակաշվիլին պահեստազորի զինծառայողների մոբիլիզացիա հայտարարեց: Վրացական բանակի, ռուս խաղաղապահների և հարավօսական աշխարհազորի միջև ընթացող մարտերին միջամտեց Հյուսիսային Կովկասում տեղակայված ռուսական 58-րդ բանակը: Ռուսաստանյան ստորաբաժանումները անցան լայնածավալ հարձակման:

Մի քանի օրում ռուսաստանյան ստորաբաժանումները վերահսկողություն սահմանեցին Վրաստանի արևմտյան շրջանների վրա:

Ռուս-վրացական պատերազմը հարյուրավոր մարդկանց կյանք խլեց, ավերածությունների պատճառ դարձավ հարևան Վրաստանում, հանգեցրեց Աբխազիայի և Հարավային Օսիայի անկախության միակողմանի ճանաչմանը Ռուսաստանի կողմից:

Վրաստանի և Ռուսաստանի միջև հրադադար հաստատվեց Ֆրանսիայի այն ժամանակվա նախագահ Նիկոլա Սարկոզիի միջնորդական ջանքերի շնորհիվ: Պաշտոնական Մոսկվան պատերազմի ավարտից 13 օր անց՝ օգոստոսի 26-ին, պաշտոնապես ճանաչեց Հարավային Օսիայի և Աբխազիայի անկախությունը:

Վրաստանում օգոստոսի 6-ից սկսվել է ռուս-վրացական պատերազմի զոհերի հիշատակման մեկշաբաթյակը: Հիշատակի շաբաթի նշանը կարմիր կակաչն է:

Արդեն ավանդական դարձած միջոցառումը անցկացվում է վրացական «Փրայմ-թայմ» թերթի նախաձեռնությամբ: Շաբաթվա ընթացքում Վրաստանում կվաճառվեն կարմիր կակաչի նշաններ, որոնց 1.5 լարի (շուրջ 350 դրամ) կազմող գնից ստացված ամբողջ հասույթը կծախսվի բարեգործական նպատակներով:

Նշենք նաև, որ այսօր, բոլոր պետական հիմնարկությունների շենքերի վրա ծածանվող վրացական դրոշները իջեցվել են:

Հիշեցնենք, որ 4 տարի առաջ տեղի ունեցած պատերազմի ընթացքում վրացական կողմն ունեցավ 413 զոհ, որոնցից 166-ը՝ զինվորական, 16-ը' ոստիկան, իսկ 220-ը քաղաքացիական բնակչությունից էին: