Պուտինը լրագրողներից էր իմացել պատերազմի սկսվելու մասին

Ռուսաստանի Դաշնության նախագահ Վլադիմիր Պուտինը, ով 2008 թվականի ռուս-վրացական պատերազմի ժամանակ երկրի վարչապետն էր, այսօր անկեղծանալով՝ հայտնել է, որ պատերազմի սկսվելու մասին իմացել էր լրագրողներից: Այդ մասին հաղորդում է РИА Новости-ն:

«Որքան էլ զարմանալի թվա, օգոստոսի 5-ին, 6-ին, 7-ին և 8-ին Ցխինվալում տեղի ունեցածի մասին ես տեղեկանում էի հենց լրագրողներից, քանի որ նրանք էին Հարավային Օսիայից զանգահարում իմ մամլո խոսնակին, որն էլ մոտենում էր ինձ և հղում անելով նրանց՝ տեղեկացնում պատերազմի մասին», - ասել է Վլադիմիր Պուտինը և հավելել. «Ճիշտն ասած՝ այդ օրերին դա իմ տեղեկատվության միակ հիմնական աղբյուրն էր»:

Վլադիմիր Պուտինի այս հայտարարությունից հետո որոշ փորձագետներ կասկածի տակ են դրել Ռուսաստանի հետախուզական ծառայությունների կոմպետենտությունը, քանի որ վերջիններս պարտավոր էին երկրի ղեկավարությանը տեղյակ պահել մարտական գործողությունների սկսվելու մասին: