Քննարկվեցին «Սփյուռք» ամառային դպրոցի արդյունքները

«Սփյուռք» ամառային դպրոցի ուսուցիչների վերապատրաստման և լեզվի արագացված ուսուցման դասընթացների արդյունքների ամփոփման նպատակով ՀՀ սփյուռքի նախարար տիկին Հրանուշ Հակոբյանի մոտ 2012թ. օգոստոսի 8-ին կայացավ հանդիպում' աշխատանքային խմբի անդամների և դասախոսների, ԵՊՀ և նախարարության պատասխանատուների մասնակցությամբ:

Հանդիպմանը ներկա էին Յուրա Ավետիսյանը (ԵՊՀ սփյուռքագիտության ամբիոնի վարիչ), Կամո Աթայանը («Ամառային դպրոցի» ԵՊՀ պատասխանատու), Հիլդա Գալֆայան-Փանոսյանը (Սորբոնի համալսարանի դոկտոր, դպրոցի արևմտահայերենի ուսուցման դասախոս), Մարո Խաչատրյանը (Խ. Աբովյանի անվան հայկական պետական մանկավարժական համալսարանի դասախոս, «Սփյուռք» գիտաուսումնական կենտրոն, արևմտահայերենի մասնագետ), համահայկական ծրագրերի վարչության պետ Ատոմ Մխիթարյանը, գիտակրթական ծրագրերի բաժնի պետ Սիրվարդ Համբարյանը:

Նախարարը հորդորեց հանդիպման մասնակիցներին ամփոփելո ամառային դպրոցի արդյունքները, վեր հանել, վերլուծել իրականացված դասընթացների խնդիրները և բացթողումները (կազմակերպչական և բովանդակային), նախանշել ծրագրի զարգացման հեռանկարները, անելիքները՝ «Սփյուռք» ամառային դպրոցը սփյուռքահայերի համար մշտական գործող կրթական կառույց դարձնելու համար: Ծավալվեց քննարկում հայոց լեզվի արագացված ուսուցման, ուսուցիչների վերապատրաստման ծրագրերի պահանջների, բովանդակային, ծրագրային դրույթների շուրջ: Մասնակիցները նշեցին, որ «Սփյուռք» ամառային դպրոցը հաջողություն ունեցավ և կայացավ հենց մեկնարկման տարում: Այդուհանդերձ շատ անելիքներ կան ծրագրերի կատարելագործման, նախապատրաստական աշխատանքները ավելի վաղ ու արդյունավետ կազմակերպելու ուղղությամբ:

Նախարարի կողմից տրվեցին հանձնարարականներ, առանձնացվեցին այն հիմնադրույթները, որոնց ուղղությամբ պետք է սկսվեն աշխատանքները՝ 2013թ. «Սփյուռք» ամառային դպրոց ծրագիրը ավելի գործուն, արդյունավետ իրականացման համար: