Հոկեյի թիմին անպետք գույքով «ապահովող» սպորտի նախարարի նկատմամբ հարուցվել է քրեական գործ

Պետպատվերով, իրական գինը ավելի քան 7 մլն ռուբլով գերազանցած անորակ գույք ձեռք բերելու համար Կամչատկայի երկրամասի սպորտի և տուրիզմի նախարարի նկատմամբ հարուցվել է քրեական գործ,-հաղորդում են ռուսական լրատվամիջոցները:

Կամչատկայի երկրամասի սպորտի և տուրիզմի նախարարը և անհատ ձեռներեցը կասկածվում են ՌԴ քրեական օրենսգրքի 4-րդ մասի 159 հոդվածի հատկանիշներով հանցագործություն (նախնական պայմանավորվածությամբ մի խումբ մարդկանց կողմից առանձնահատուկ խոշոր չափերով խարդախություն) կատարելու մեջ:

Համաձայն քննական վարկածի չինովնիկը իմանալով, որ երիտասարդ հոկեյիստների համար սպորտային գույք և հագուստներ ձեռք բերելու նպատակով 2011թ. բյուջեով հատկացումներ են նախատեսված, առաջարկել է մի անհատ ձեռներեցի մասնակցել սպորտային գույքի վաճառքի աճուրդին: Գործարարը ցանկանալով իրացնել իր մոտ արդեն առկա և պահանջարկ չվայելող սպորտային գույքը և հանդերձանքը, համաձայնել է այդ առաջարկին և ներկայացրել է աճուրդի փաստաթղթային հատվածը ձևակերպելու իր գույքացուցակը: Միաժամանակ համախոհները ամեն ինչ կազմակերպել են այնպես, որ աճուրդին այլ մարդիկ չմասնակցեն:

Արդյունքում, պետպատվերի շրջանակներում ձեռք է բերվել ցածրորակ և արհեստականորեն ուռճացրած գնով սպորտային գույք, որի մասն, ի դեպ, ընդհանրապես կապ չի ունեցել հոկեյի կամ հոկեյիստների հետ: Այս գործարքի հետևանքով պետությանը հասցված վնասը գնահատվել է 6 մլն 900 հազար ռուբլի:

Նախարարը և գործարարը ձերբակալված են:

«Փաստինֆո» գործակալություն