Կենդանաբանական այգում անկել է Մանվել Գրիգորյանին պատկանած եղնիկը

Օրեր առաջ՝ Երևանի կենդանաբանական այգում անկել է ԵԿՄ նախկին նախագահ Մանվել Գրիգորյանին պատկանող, Ակնալճի հանգստյան գոտուց այգի տեղափոխված եղնիկը: Այս մասին ԼՈՒՐԵՐ․com-ի հետ զրույցում ասաց Կենդանաբանական այգու մամուլի խոսնակ Աննա Վանյանը։

Նա նշեց, որ կենդանու անկման պատճառը կերակրափողում կերային խցանումն է եղել․ «Կենդանու կերակրափողում հայտնաբերվել է 25 սմ մեծությամբ կերային խցանում՝ պոլիէթիլենային տոպրակի մնացորդներով: Մյուս օրգաններում ախտաբանական փոփոխություններ չեն արձանագրվել: Կենդանու անկումը տեղի է ունեցել կերակրափողի օտար մարմնով խցանման հետևանքով: Կենդանաբանական այգին պայքար է մղում քաղաքացիների կողմից պլաստիկներով տարածքի աղտոտման դեմ, ինչպես նաև քաղաքացիների կողմից կենդանիներին իրենց կողմից բերված սննդամթերքով կերակրման դեմ: Հատուկ ցուցանակներ են փակցված մարդկանց իրազեկելու համար, որ դրանով կարող են վնասել կենդանիներին»,- ասաց նա:

Նրա խոսքով՝ կենդանին տոպրակը կարող էր, դեռ, Մանվել Գրիգորյանի մոտ պահված ժամանակ կերած լիներ․ «Հնարավոր տարբերակ կարող էր լինել, որ տոպրակը այն ժամանակ մնար ստամոքսում, փսխման արդյունքում կերակրափողով հետ գար և առաջացներ խցանում»,- ասաց Վանյանը։

Հարցին՝ ե՞րբ է անկել եղնիկը և ինչո՞ւ Կենդանաբանական այգին մինչև այս չէր հայտնում այդ մասին, մամուլի խոսնակն ասաց․ «Դեպքը տեղի է ունեցել փետրվարի 20-ին։ Սպասում էինք հետազոտության պատասխանին, որպեսզի հրապարակեինք»,- նշեց նա։

Նշենք, որ այս պահին Երևանի կենդանաբանական այգու հաշվեկշռում առկա է 30 եվրոպական եղնիկ, տվյալ եղնիկը բերվել էր 20.06.2018 թվականին, Մանվել Գրիգորյանին պատկանող Ակնալիճ գյուղի ամառանոցից և կենդանաբանական այգու հաշվեկշռում առկա չէր: