Ստեղծված խաղի կանոններին չենթարկվելու դեպքում՝ ոչինչ չէր ստացվի․ ինչու են լքել «խորտակվող նավը»

20 տարի Հայաստանը իշխած և 2018-ին իշխանությունը կորցրած Հանրապետական կուսակցության խորհրդի 3 անդամ՝ Լեռնիկ Ալեքսանյանը, Ֆիրդուս Զաքարյանը և Ռազմիկ Մարտիրոսյանը լքել են «խորտակվող նավը»։ ԼՈՒՐԵՐ․com-ի հետ զրույցում Լեռնիկ Ալեքսանյանը նշեց՝ կուսակցությունը լքելու պատճառը այն է, որ ՀՀԿ ղեկավարությունը շեղվել էր գաղափարախոսությունից, որը կրում էր ստեղծված օրից։ «Պայքար չկար կոռուպցիայի, ալան-թալանի դեմ, ՀՀԿ-ի կուսակցական կյանքը աղավաղվել էր, ներքևի հանրապետականների ձայնը այլևս լսելի չէր, խորհրդի նիստեր չէին արվում, ղեկավարությունը ՀՀԿ-ի անունից հայտարարություններ էր անում։ Տեսնում ենք, թե ինչ գնահատական է տալիս ժողովուրդը ՀՀԿ-ին, բայց ՀՀԿ-ն այդպիսին չէր։ Կարելի էր կուսակցությունը վերանորոգել, սխալներից դասեր քաղել և չկրկնել։ Մենք՝ երեքս, բազմիցս խոսել և բարձրաձայնել ենք դրանց մասին, սակայն լսող չկար։ Մեր որոշումն էլ նոր չէր, վաղուց կար ու այսօր էլ դժվարությամբ նման որոշում կայացրինք, քանի որ կուսակցություն մտել ենք հավատով, սիրով, սակայն չենք ուզում պատասխան տալ այն արարքների համար, որի դեմ կուսակցությունում եղած ժամանակ պայքարել ենք․ ընտրակեղծիք, կոռուպցիա և այլն»,- ասաց նա։

Անդրադառնալով կուսակցության արձագանքին, Ալեքսանյանը նշեց՝ վերնախավը, բնականաբար, չէր կարող լավ արձագանքել։ Նրա խոսքով՝ 2-3 տարի է այդ խոսակցությունը կար կուսակցությունում և ղեկավարության համար իրենց որոշումը նորություն չէր։

Նա ՀՀԿ առաջնորդ Սերժ Սարգսյանին մեղադրում է կուսակցությունում քրեաօլիգարխիկ տարրերի ամրապնդման մեջ․ «Քրեաօլիգարխիկ տարրեր ՀՀ 3 նախագահների ժամանակ էլ եղել են, ուղղակի պետք էր պայքարել դրա դեմ, 90-ականներից ասում ենք այդ մասին»։ Հետաքրքրվեցինք՝ ՀՀԿ-ից ո՞ւմ նկատի ունի քրեաօլիգարխիք տարրեր անվանելով, Ալեքսանյանը չցանկացավ անուններ հնչեցնել՝ ասելով, որ նրանց մասին բոլորը գիտեն․ «Ես նրանց էլ չեմ մեղադրում․ օրենքով դժվար էր բիզնես անել, քանի որ խաղի կանոններ էին ստեղծված, եթե դրանց չենթարկվեիր, ուրեմն քեզ մոտ ոչինչ չէր ստացվի։ Մեծահարուստների գիտեմ, որ չէին ցանկանում պատգամավոր դառնալ, բայց ստիպված էին քաղաքական դաշտ մտնել, որպեսզի իրենց պաշտպանեին»,- ասաց Ալեքսանյանը։ 

Թե հետագայում ի՞նչ գործունեություն է ծավալելու ու հնարավո՞ր է միանա իշխանական թիմին՝ Ալեքսանյանն ասաց․ «Դեռ չգիտեմ, բայց հաստատ ինչ-որ բանով կզբաղվեմ։ Այս իշխանությունն էլ նույն այդ վտանգներն ունի․  այն տարրերը, որոնք եղել են ՀՀՇ-ում, հետո ՀՀԿ-ում չի բացառվում, որ մտնեն այս իշխանության մեջ։ Կախված է նրանից, թե իշխանությունների քաղաքականությունն ինչ ընթացք կունենա։ Այն քաղաքական ուժը, որը դրական բան կանի, մենք պատրաստ ենք օգնել, որ մեր երկիրը կարգին երկիր դառնա»,- նշեց ՀՀԿ խորհուրդը լքած Ալեքսանյանը։ 

Սոնա Հարությունյան