Վարչապետը, կառավարության անդամներն այցելել են սիրիահայ երեխաներին (տեսանյութ)

Վարչապետ Տիգրան Սարգսյանը, Սփյուռքի նախարար Հրանուշ Հակոբյանը, տարածքային կառավարման փոխնախարար Վաչե Տերտերյանն ու Հայաստանում Սիրիայի դեսպանն այսօր այցելել են Հանքավանի «Լուսաբաց» ճամբար, որտեղ իրենց հանգիստն են անցկացնում Դամասկոսից ժամանած շուրջ 120 երեխաներ, իսկ Տիգրան Սարգսյանը երեխաների հետ քոչարի է պարել:

Հիշեցնենք, որ շուրջ 120 սիրիահայ երեխաներ ՀՀ կառավարության հրավերով Հայաստան են ժամանել՝ օգոստոսի 9- 23 –ը:

Ողջունելով սիրիահայ երեխաներին՝ վարչապետ Տիգրան Սարգսյանը նշել է, որ երեխաներին ու նրանց ընտանիքներին է փոխանցում նաև ՀՀ նախագահ Սերժ Սարգսյանի ողջույնը և հավաստիացրել, որ սիրիահայերի խնդիրը, ինչպես նաև նրանց հետ առնչվող բոլոր միջոցառումները գտնվում են ՀՀ նախագահի ուշադրության ներքո:

«Այս գեղեցիկ օրերը, որ անց ենք կացնում Հայաստանում, համախմբում է ողջ ժողովրդին սիրիահայերի խնդիրների շուրջ: Եվ բոլորը՝ թե՛ մասնավոր հատվածը, թե՛ Կառավարությունը փորձում են աջակցել նրանց»,- հայտարարեց վարչապետ Տիգրան Սարգսյանը, խոստանալով, որ Կառավարությունն ամեն ինչ կանի սիրիահայերի հոգսը թեթևացնելու համար:

«Այս մթնոլորտը, որ տիրում է Հայաստանում, կօգնի լուծել սիրիահայերի առաջ ծառացած խնդիրները»,- ավելացրեց ՀՀ վարչապետը:

«Լուսաբաց» ճամբարի տնօրեն Աշոտ Ավետիսյանը նշեց, որ սիրիահայ երեխաները տեղացի երեխաների հետ շփվելիս լեզվի հետ կապված խնդիրներ չեն ունենում:

«Նրանց օրը բավականին հագեցած է՝ արշավներ, զրույցներ և ակտիվ ժամանց»,-ասաց ճամբարի տնօրենը:

Այս տարվա ընթացքում «Լուսաբաց» ճամբարն երկու հերթափոխներով ընդունել է 700 երեխա, որոնցից 120-ը՝ սիրիահայ երեխաներ:

Tert.am