Ոստիկանները հայտնաբերել են ՊՆ 23-ամյա ծառայողին, ով կրկնակի վրաերթի էր ենթարկել 35-ամյա հետիոտնին. վերջինս մահացել էր

Այօր՝ մարտի 9-ին, Երեւանի ՃՈ պահպանվող հատուկ տարածք է տեղափոխվել Mercedes մակնիշի 48 CC 400 համարանիշի ավտոմեքենան։ Shamshyan.com-ի  հաղորդմամբ, նշված ավտոմեքենան վարել է Երեւան քաղաքի Էրեբունի վարչական շրջանի բնակիչ՝ 23-ամյա Գոշ Սարգսյանը, ով կասկածվում է մարտի 1-ին Խանջյան փողոցի 11 հասցեի մոտ մեկ այլ ավտոմեքենայի կողմից վրաերթի ենթարկված հետիոտնին կրկնակի վրաերթի ենթարկելու մեջ, որից հետո Գ. Սարգսյանը վրաերթի ենթարկվածին թողնելով անօգնական՝ դիմել էր փախուստի։

Օրեր անց ոստիկանները հայտնաբերել են Գ. Սարգսյանին եւ Mercedes-ը։ Աղբյուրի տեղեկություններով՝ Գ. Սարգսյանը ծառայում է ՀՀ պաշտպանության նախարարությունում։

Հիշեցնենք, որ մարտի 1-ին մահվան ելքով վրաերթ-ավտովթար էր տեղի ունեցել Երեւանում: Ժամը 00:10-ի սահմաններում Երեւանի բնակիչ, 23-ամյա Ալեքս Սաղյանը իր վարած Opel մակնիշի 36 OD 331 համարանիշի ավտոմեքենայով Խանջյան փողոցի թիվ 11 հասցեի մոտ՝ հետիոտնի համար նախատեսված վերգետնյա անցումի հարեւանությամբ վրաերթի էր ենթարկել փողոցը չթույլատրելի հատվածով անցնող, Երեւանի բնակիչ, 35-ամյա Վլադիմիր Մարգարյանին: Վրաերթից հետո Ա. Սաղյանը բախվել էր Երեւանի բնակիչ, 36-ամյա Արթուր Աղաբեկյանի վարած Renault մակնիշի 188 AG 61 համարանիշի ավտոմեքենային: Opel-ի վարորդը փախուստի չէր դիմել, ահազանգել էր Երեւանի 1-03 շտապօգնություն, օգնել էր վրաերթի ենթարկվածին տեղափոխել Երեւանի թիվ 1 համալսարանական հիվանդանոց:

Մինչ տեղում հետաքննիչը աշխատանքներ էր կատարում, հիվանդանոցից ահազանգ էր ստացվել, որ վրաերթի ենթարկվածը գիտակցության չգալով՝ մահացել է: