«Դա անընդունելի է մեզ համար». Փաշինյանը՝ Թավշյա հեղափոխության պահապանների գործողությունների մասին

ՀՀ վարչապետ Նիկոլ Փաշինյանը իր և իշխանության աջակիցներին հորդորեց իրենց ուղղված հայհոյանքներին, վիրավորանքներին հայհոյանքով ու վիրավորանքով չպատասխանել: Փաշինյանն այս մասին ասաց սահմանադրական փոփոխությունների հանրաքվեի շրջանակում Վայքի բնակչության հետ հանդիպմանը:

«Երեկ մի խումբ մարդիկ, որոնք հանդես են գալիս որպես Թավշյա հեղափոխության պահապաններ, գնացել և ինչ-որ մարդուց, որը իմ հասցեին ինչ-որ վատ բան կամ հայհոյանք է ասել, պահանջել են ներողություն խնդրել: Դա անընդունելի է մեզ համար: Մենք հայհոյանքին հայհոյանքով չպետք է պատասխանենք, վիրավորանքին վիրավորանքով չպետք է պատասխանենք: Բայց մարդիկ գնում նման բաներ են անում՝ ի պաշտպանություն մեզ, ի պաշտպանություն ինձ: Բայց ես դատապարտում եմ, անընդունելի եմ համարում նման գործողությունները՝ մանավանդ այն ֆոնին, որ ես երկու օր խոսում եմ այդ մասին»,-ասաց նա:

Փաշինյանը իրենց բոլոր կողմնակիցներին կոչ արեց նման սադրանքների չտրվել: Նա նշեց՝ կարևորն այն է, թե արդյոք այդ հայհոյանքի հիմքում ճշմարտություն կա, թե ոչ: «Եթե ճշմարտություն կա, ճիշտ են անում, որ հայհոյում են, եթե չկա, ուրեմն անիմաստ է նրանց հայհոյելը, ինչքան ուզում են, թող հայհոյեն: Կարևորը ժողովուրդը գիտի ճշմարտությունը, այսօր Հայաստանում կա վստահության մթնոլորտ»,-ասաց վարչապետն ու նշեց՝ ոմանց երազանքները վերջին օրերին փշուր-փշուր եղան: