Վճարումների հետ կապված «Վիվա-ՄՏՍ»-ի հայտարարությունը թյուրիմացություն է առաջացնում. ընկերությունից պարզաբանում են

Կորոնավիրուսի տարածմամբ պայմանավորված՝ օրեր առաջ «Վիվա-ՄՏՍ»-ը հայտարարություն տարածեց, որ կուտակված և չվճարված պարտքերի պատճառով կապի ծառայությունները չեն կասեցվի, իսկ վճարումը կատարելու ժամկետները կհետաձգվեն մինչև ս.թ. ապրիլի 16-ը: Չնայած սրան՝ ԼՈՒՐԵՐ.com-ի աշխատակցի օրինակով պարզ դարձավ, որ վճարում չկատարելու արդյունքում՝ չի կարողանում օգտվել որևէ ծառայությունից:

Երեկ մեր աշխատակցի քարտի վճարման վերջին օրն էր, սակայն վճարում չկատարելու հետևանքով նա չէր կարողանում զանգեր կատարել, միայն զանգեր էր ստանում: Հայտարարությունից տպավորություն էր, թե խոսքը բոլորին է վերաբերում, այնինչ՝ այդպես չէ:

Ընդգծենք, որ  թեև վճարման օրն էր, սակայն սակագնային պլանով սահմանված լիմիտը չէր ավարտվել:

Ստացվում է՝ «ՎիվաՍել-ՄՏՍ» ընկերության հայտարարությունը թյուրիմացություն է առաջացնում հաճախորդների մոտ, պարզվում է՝ «ծառայությունները չեն կասեցվի» արտահայտությունը ոչ բոլորի համար է, այնպես որ՝ անակնկալներից խուսափելու համար հարկավոր է ժամանակին կատարել վճարումները:

Մեզ հետ զրույցում «Վիվա-ՄՏՍ» ընկերության հանրային կապերի պատասխանատու Վահե Իսահակյանը նշեց, որ նախ պետք է հասկանալ հետվճարային, թե կանխավճարային քարտի մասին է խոսքը. «Հայտարարությունը կանխավճարայինին չի վերաբերում: Էական նշանակություն ունի հասկանալ՝ քաղաքացին գերազանցե՞լ է լիմիտը, թե՞ ոչ: Օրինակ՝ 7500 դրամանոց փաթեթի դեպքում՝ (Խմբ.- մեր բերած օրինակի դեպքում) լիմիտ գերազանցելիս՝ դա ոչ թե պարտքի կուտակում է համարվում, այլ՝ լիմիտի գերազանցում: Եթե լիմիտը լրանալիս՝ չանջատվի, հաճախորդը գուցե բողոքի, թե ինչու լիմիտը լրանալիս՝ չի անջատվել, և ինքը ստիպված է եղել ավել խոսել և պարտք կուտակել: Այսինքն՝ մենք անջատում ենք ոչ թե նրա համար, որ պարտք է կուտակվում, այլ նրա համար, որ հաճախորդն է խնդրել իր լիմիտը լրանալիս՝ անջատել»,- ասաց Իսահակյանը:

Նա նշեց, որ ընկերության հայտարարությունը վերաբերում է պարտքի կուտակմանը, սակայն չի վերաբերում լիմիտն անցնելու դեպքերին: 

Լրացված

Մեր հրապարակումից անմիջապես հետո «Վիվա-ՄՏՍ» ընկերության հանրային կապերի պատասխանատու Վահե Իսահակյանը իրավիճակի վերաբերյալ ևս մեկ պարզաբանում է ուղարկել, որը ներկայացնում ենք ստորև առանց որևէ խմբագրման.

Հարկ ենք համարում լրացուցիչ պարզաբանում ներկայացնել ս.թ. մարտի 20-ին lurer.com կայքէջում լույս տեսած՝ «Վճարումների հետ կապված՝ «Վիվա-ՄՏՍ»-ի հայտարարությունը թյուրիմացություն է առաջացնում» հրապարակման վերաբերյալ:

Ս.թ. մարտի 16-ին ու 17-ին՝ արտակարգ դրություն հայտատարելուցանմիջապես առաջ և դրանից հետո, Վիվա-ՄՏՍ-ը հայտատարություն է տարածել տպագիր, առցանց ու հեռուստատեսային ԶԼՄ-ներով առ այն, որ, իրավիճակով պայմանավորված՝ կուտակված և չվճարված պարտքերի պատճառով կապի ծառայությունները չեն կասեցվի, իսկ վճարումը կատարելու ժամկետները կհետաձգվեն մինչև ս.թ. ապրիլի 16-ը, ինչը ենթադրում է, որ խոսքը բացառապես հետվճարային սակագնային պլանների մասին է:

Հեռահաղորդակցության ոլորտում գործում է ըստ ծառայությունների սպառման դիմաց վճարումների սկզբունքի՝ սակագնային պլանների երկու տեսակ՝ կանխավճարային ու հետվճարային: Կանխավճարային ծառայությունների դեպքում հաշիվը լիցքավորվում է նախապես: Հետվճարային ծառայությունների դեպքում՝ սպառված ծառայությունների դիմաց գանձումն իրականացվում է նշված ծառայությունները սպառելուց հետո: Հետևաբար նաև՝ պարտքեր կարող են գոյանալ բացառապես հետվճարային սակագնային պլանների պարագայում: Կանխավճարային սակագնային պլանների դեպքում պարզապես սպառվում է նախապես լիցքավորված գումարը:

Հրապարակման մեջ վկայաբերված՝ աշխատակցի քարտի վերաբերյալ, հարկ ենք համարում տեղեկացնել, որ Վիվա-ՄՏՍ-ն ի դեմս իր լրատվական ծառայության, տվյալ բաժանորդի վերաբերյալ Lurer.com լրատվականի հարցումը ստանալուց անմիջապես հետո, թե՛ բաժանորդային սպասարման աշխատակցի, և թե լրատվական ծառայության համակարգողի միջոցով տեղեկացրել է բաժանորդին, որ քարտը կանխավճարային է, այսինքն՝ այն չի կարող պարտքեր ունենալ ու համապատասխանաբար՝ զրկվել ծառայությունների մատուցումից՝ գոյություն չունեցող այդ պարտքի պատճառով: