Բերեզովսկին՝ Պուտինին. «Ազա´տ թող Ռուսաստանը»

Ռուսաստանի իշխանությունից Լոնդոնում պատսպարված գործարար Բորիս Բերեզովսկին իր ֆեյսբուքյան էջում բաց նամակ է հղել ՌԴ նախագահ Վլադիմիր Պուտինին, որում, դիմելով Ռուսաստանի նախագահին դու-ով, մասնավորապես, նշում է.

«Վոլոդյա, այսօր ուղղափառ աշխարհը սկսում է պահք պահել, որը  նվիրված է Սուրբ Աստվածածնի վերափոխմանը։ Եվ այսօր ես դիմում եմ քեզ ոչ թե որպես քաղաքական գործիչն՝ իր մրցակցին և ոչ որպես հալածյալն՝ իր հալածողին։ Ես խոսում եմ քեզ հետ, ինչպես քրիստոնյան քրիստոնյայի հետ։

Օգոստոսի 17-ին դու պետք է դատավճիռ կայացնես Մաշա Ալյոխինայի, Կատյա Սամուցեվիչի և Նադյա Տոլոկոնիկովային նկատմամբ։ Ես գիտեմ, որ գործում ներգրավված են դատավորներ, դատախազներ, քննիչներ, սակայն Ռուսաստանն ու աշխարհը գիտի, որ դատավճիռը կայացնում ես անձամբ դու։

Գթա´, որպեսզի արժանանաս գթության։

Ես գիտեմ, թե որքան դժվար է քեզ, որքան դժվար է քեզ կրել 12 տարվա ընթացքում կատարած սխալների բեռը, ողբերգական սխալների, երբեմն՝ ճակատագրական։ Այնքան դժվար է, երբ դու ամբողջովին ժխտում ես դրանք՝ ներկայացնելով քեզ բացարձակապես անմեղ։ «Սխալներ՝ ընտրության առումով ... զարգացման, հարցեր լուծելու ուղիների ընտրության... չեն եղել », - այդ խոսքերով դու ամփոփեցիր քո նախագահության առաջին երկու ժամանակաշրջանները։ Ես գիտեմ, թե որքան դժվար է քեզ, որովհետև ես գիտեմ, թե որքան ծանր է չխոստովանված սխալների բեռը, ես պահել էի դրանք իմ սրտում, մինչև հրապարակավ ապաշխարելը։ Հասկացիր՝ ապաշխարումը, հատկապես՝ հրապարակավ, հատկապես՝ ամրագրված գործով, ուժի, այլ ոչ թե թուլության դրսևորում է, Վոլոդյա...

 Օգոստոսի 17-ը Ռուսաստանի համար նշանակալից օր է։ 1998 թ. օգոստոս 17-ին սկսվեց ճգնաժամը, որը դրանից մեկ տարի հետո բերեց քեզ իշխանության՝ վարչապետի աթոռին։ 2000 թ. օգոստոս 17-ին՝ քո նախագահության ամենասկզբում, դու վերջապես դադարեցրիր արձակուրդդ Սոչիում՝ «Կուրսկ» սուզանավի կործանումից հինգ օր հետ։ 2012 թ. օգոստոս 17-ը կամփոփի քո էպոխան։

Վոլոդյա´, ազա´տ թող Ռուսաստանը և քեզ՝ գթության դարաշրջանում»։

Հիշեցնենք, որ Pussy Riot փանք խմբի երեք մասնակիցների՝ Նադեժդա Տոլոկոննիկովային, Մարիա Ալյոխինային, Եկատերինա Սամուցեվիչին, մեղադրանք է ներկայացվել ՌԴ-ի Քրեական օրենսգրքի 213-րդ հոդվածի 2-րդ մասով՝ «Խուլիգանություն»՝ Մոսկվայում Քրիստոս փրկչի եկեղեցում «Աստվածամայր, վռնդիր Պուտինին» շարականը երգելու համար: Առավելագույն պատիժը 7 տարվա ազատազրկումն է: