Չկա մի թաղամաս, որը զրկվել է տրանսպորտից. Սերգեյ Հարությունյան

Չկա մի թաղամաս, որը զրկվել է տրանսպորտից, ամեն տեղ էլ կա տրանսպորտ, պարզապես քանակը սակավել է։ Այս մասին այսօր՝ մարտի 21–ին, լրագրողների հետ հանդիպման ժամանկ ասաց Երեւանի քաղաքապետի տեղակալ Սերգեյ Հարությունյանը՝ պատասխանելով լրագրողի այն հարցին, թե երթուղայինների վարորդները հիմնականում 60–70 տարեկան են, այս օրերին նրանք մեկուսացել են տներում, ինչի հետևանքով մի շարք թաղամասերում տրանսպորտի հետ կապված խնդիրներ են առաջացել։

Հարությունյանի խոսքով, եթե, օրինակ, մետրոն սովորական օրերին ունենում է շուրջ 75 հազար ուղևորափոխադրում, այս պահին ունի մոտ 15 հազար. «Ավտոբուսների դեպքում 70 հազար էր, այսօր 20 հազար է:

Ինչ վերաբերում է միկրոավտոբուսներին, ապա եթե մինչև այս օրական 850-900 միկրոավտոբուս էր դուրս գալիս, այս պահին 500 է դուրս գալիս:

Բնական է, որ այն վարորդները, որոնց աշխատելը ցանկալի չէ՝ 60 անց են, խրոնիկ հիվանդություն ունեն և այլն, տանն են, չեն աշխատում: Արդյունքում` որոշակի ծանրաբեռնվածություն է ստեղծվում այն կազմակերպությունների վրա, որոնք իրականացնում են ուղևորափոխադրում, բայց ես Ֆեյսբուքում մի քանի գրառում տեսա, որ մեր քաղաքացիները հավելյալ վճարում են մեր վարորդներին, ովքեր այս օրերին աշխատում են»:

Փոխքաղաքապետն ասաց, որ բոլոր թաղամասերում էլ տրանսպորտ կա, ուղղակի քանակն է պակասել: Նրա խոսքով՝ խնդիրը ժամանակավոր է եւ վստահություն հայտնեց, որ ամեն ինչ լավ է լինելու. «Հասկանում ենք դժվարությունները, հայցում ենք մեր քաղաքացիների ներողամտությունը: Սակայն սա ժամանակավոր է, ամեն ինչ լավ է լինելու»: