Երաշտը ռուս գյուղացիներին 36.5 մլրդ ռուբլու վնաս է հասցրել

Ռուսաստան 16 Օգոստոս, 2012 13:37

Ռուսաստանի հարավային տարածաշրջաններում երաշտի հետևանքով ոչնչացվել է 5.56 մլն. հեկտար ցանքատարածություն, որնը ընդհանուր ցանքատարածությունների մեջ կազմում է 7.3%: Ինչպես հայտնում Է РБК daily օրաթերթը, տարածաշրջանային իշանություններն այս թվերը հայտնել են գյուղատնտեսության նախարարությունում տեղի ունեցած խորհրդակցության ժամանակ:

Վնասներ են կրել մոտ 7,000 գյուղացիական տնտեսություններ: Արտակարգ իրադրության ռեժիմ Է հայտարարվել Ռուսաստանի 17 սուբյեկտներում, իսկ թվով 10 տարածաշրջան ֆինանսական օժանդակության խնդրանքով դիմել է կառավարությանը:

Ըստ տարածաշրջանային իշխանությունների կատարած հաշվարկների՝ հարավային տարածաշրջաններում երաշտն ագարակատերերին հասցրել Է 36.5 մլրդ. ռուբլու վնաս: Վնասի չափը գրեթե հավասարվել է չորային 2010 թվականի ցուցանիշներին, երբ հողատերերը եղանակային պայմանների պատճառով կորցրել էին 41.8 մլրդ. ռուբլի: Ըստ զանգվածային լրատվամիջոցների հաղորդումների՝ պարենային ապրանք արտադրողներն արդեն սկսել են բարձրացնել իրենց արտադրանքի գները:

Բացի Ռուսաստանից, երաշտը վնասներ է հասցրել աշխարհի շատ տարածաշրջաններում, մասնավորապես ԱՄՆ-ում, որտեղ շոգ եղանակից տուժել Է նահանգների մեկ երրորդը: Ամերիկայում բերքի կրճատման պատճառով հացահատիկի, եգիպտացորենի և սոյայի համաշխարհային գներն արդեն ավելի քան երկու ամիս անընդհատ աճում են:

Թանկացումներ են նկատվում նաև մսի և կաթի շուկայում, քանի որ հացաբույսերն անասնակեր են, իսկ կերի ծախսերը մտնում են անասնաբուծական արտադրանքի ինքնարժեքի մեջ: