ՀԷԿ չունեմ, բայց դրանց ջատագովն եմ․ ովքեր դեմ են էներգետիկ անկախությանը, մեր թշնամիներն են․ Արայիկ Հարությունյան

Նրանք, ովքեր ոչ իրավական միջամտություն կցուցաբերեն ՀԷԿ-երի շինարարությանը, օրենքով պատասխան են տալու։ Այս մասին այսօր լրագրողների հետ զրույցում ասաց Արցախի նորընտիր նախագահ Արայիկ Հարությունյանը։ «Եթե տվյալ ՀԷԿ-ի շինարարությունը չի համապատասխանում մեր բնապահպանական նորմերին, ոչ միայն չենք թույլատրելու, այլ նաև պատժելու ենք այն բոլոր նախագծողներին և թույլատրողներին, ովքեր սկսել են շինարարությունն իրականացնել։ Բայց, եթե բնապահպանական որևէ խախտում չկա ու որևէ մեկը փորձի խանգարի, դա համարելու եմ մեր տնտեսության զարգացման խոչընդոտ, միջամտություն, ընդհուպ մինչև դիվերսիա մեր երկրի զարգացման ուղղությամբ և պատասխան են տալու օրենքի առաջ, ով ուզում է լինի»,-ասաց Հարությունյանը։  Հարցին, թե նա էլ է ունեցել ՀԷԿ, Հարությունյանը պատասխանեց․ «Ես չունեմ ՀԷԿ, բայց ես ամենամեծ ջատագովն եմ եղել ՀԷԿ-երի շինարարությանը և շարունակելու եմ  լինել, որովհետև մենք պարենային և էներգետիկ անկախության այլ հնարավորություն չունենք։ Ովքեր դեմ են մեր էներգետիկ անկախությանը, մեր թշնամիներն են»։