Պետությունը կարողանում է պատգամավորին 450 000 դրամ աշխատավարձ և 150 000 պարգևավճար տալ, եթե որևէ մեկը դժգոհ է, թող գնա ուրիշ բան մտածի․ Միրզոյան

Քաղաքական 17 Ապրիլ, 2020 15:00

Մեր երկրում, միգուցե բոլոր երկրներում միշտ կլինեն մարդիկ, որոնք սոցիալապես ավելի խոցելի են եւ չունեն այն երազելի, ցանկալի եկամուտները, հետեւաբար միշտ կլինեն քննարկումներ, թե որքանով են պաշտոնյաների աշխատավարձերը կամ պարգեւավճարները բարձր կամ ցածր: Այս մասին այսօր՝ ապրիլի 17-ին ԱԺ-ում լրագրողների հետ զրույցում նշեց ԱԺ նախագահ Արարատ Միրզոյան:

«Երբ ես հայտարարեցի, որ պարգեւավճարի ողջ ֆոնդը փոխանցվում է կորոնավիրուսի դեմ պայքարին, դժգոհություն արտահայտող մեկնաբանություններ եղան: Տեսակետներ էին արտահայտում, որից հասկացա, որ մարդիկ մտածում են, թե միլիոնավոր դրամներով պարգեւավճար է ստանում պատգամավորը: Պատգամավորի աշխատավարձը 450 հազար դրամի կարգի է, դրա 30 տոկոսի չափով էլ պարգեւավճար է ստանում, որը մոտ 150 հազար դրամ է: ԱԺ-ում պարգևավճար ստանում են բոլոր 700 աշխատակիցները՝ առանց բացառության, եւ հավասար՝ 30 տոկոսի չափով»,-ասաց ԱԺ նախագահը:

Միրզոյանը նշեց, որ պետությունը կարողանում է պատգամավորին 450 000 դրամ աշխատավարձ և 150000 պարգևավճար տալ․ «Եթե որևէ մեկը դժգոհ է, թող գնա ուրիշ բան մտածի»։

Նա հայտնեց, որ միայն պատգամավորների մարտ ամսվա պարգևավճարներն են փոխանցվել. «Համարյա բոլոր պատգամավորների, որովհետեւ 1-2 պատգամավորներ եղան, որ կամ արդեն գումար փոխանցել էին, կամ մարզերից էին: Ամեն դեպքում, գրեթե բոլորի պարգևավճարը փոխանցվել է: Մի քիչ դժվար որոշում էր ինձ համար, սակայն ես կայացրի այն»,-ասաց Միրզոյանը:

Նա նաև շեշտեց, որ 7-րդ գումարման ԱԺ-ի պատգամավորների ճնշող մեծամասնությունը մարդիկ են, որոնք չունեն այլ բիզնեսներ, այլ եկամուտներ: Նրանք առավոտից երեկո աշխատում են այստեղ, ջանքեր են գործադրում, որ տարբեր ոլորտներում բարելավեն մարդկանց կյանքը և դրա համար վճարվում են: Կա սահմանված աշխատավարձ և օրենքով, բյուջեով նախատեսված 30 տոկոսի չափով սահմանված պարգևավճար՝ պետական ծառայության համակարգում բոլորի համար: Նա նշեց՝ իր ԱԺ նախագահ դառնալուց հետո փորձ են արել աշխատակազմում պարգևավճարը բաժանել՝ կախված ամսվա առաջադրանքներից ու կատարողականից, սակայն նկատել են, որ մի քիչ դժվարություններ կան և գուցե անարդարություն լինի: Եվ հիմա վաղուց արդեն բոլորին հավասար 30 տոկոս պարգևավճար կոչված հավելյալ աշխատավարձ է տրվում: Միրզոյանը նշեց նաև, որ պատգամավորների պարգևավճարը ամսական մոտ 150 հազար դրամ է: