Կա ինձ համար հարգելի քաղաքական ուժերի մի հատված, որը նույնպես հիասթափվելու պատճառ ունի. վարչապետ

Հիասթափվող խմբերից են քաղաքական ուժերը, որոնք ես բաժանել եմ երկու խմբի: Այս մասին այսօր՝ ապրիլի 20-ին, Ֆեյսբուքի իր ուղիղ եթերում նշեց ՀՀ վարչապետ Նիկոլ Փաշինյանը:

«Առաջինը այն քաղաքական ուժերն են, որոնք նախկին իշխանությունների հետ գծել էին առաջիկա 10 տարվա հետ իրենց համատեղ անելիքները: Ես նկատի ունեմ իշխող քաղաքական ուժին սպասարկող ուժերին: Ոմանք պետք է սպասարկեին կառուցողական ընդդիմության դերում, ոմանք ոչ այնքան կառուցողական ընդդիմության դերում: Ամեն մեկն իր դերակատարումը պիտի ունենար: Հիմա հեղափոխության արդյունքում այս սեգմենտի համար պլանները փլուզվել են: Ընդ որում, կառուցված պլանները ոչ միայն փլուզվել են, այլեւ անիմաստ են դարձել:

Բայց կա նաեւ ինձ համար հարգելի քաղաքական ուժերի մի հատված, որը նույնպես հիասթափվելու պատճառ ունի: Այդ պատճառը հետեւյալն է. այդ ուժերը երկար տարիներ զարգացրել են մի ասելիք, բայց հեղափոխության արդյունքում պարզվել է, որ իրականության մեջ այդ ասելիքը չի արդարացել:

Հիմա կան շատ երկար տարիներ ընդդիմադիր գործունեությունը ծավալած շատ հարգելի քաղաքական ուժեր, որոնք մի ասելիք են ձեւակերպել, որոնց հետ ես մի X պահի իմ անհամաձայնությունը ֆիքսել եմ եւ մենք գնացել ենք տարբեր ճանապարհներով: Հիմա տեղի է ունեցել հեղափոխություն, մինչդեռ այդ ուժերն ասում էին, որ այն, ինչ մենք ենք ասում, անհեթեթություն է, անիմաստ է, պրոյեկտ է եւ այլն: բայց փաստն այն է, որ հեղափոխությունը տեղի է ունեցել:

Այն ուժերը, որոնք հակառակ տրամաբանությունն էին առաջ քաշում, ըստ էության զրկվել են քաղաքական ասելիքից: Նրանք նույնպես լեգիտիմ պատճառ ունեն հիասթափության»,-հայտարարեց Փաշինյանը:

Հաջորդ խումբը, որը հիասթափվելու պատճառ ունի դրանք արեւմտամետներն են, որոնք կամ հավատացել են, կամ հույս են ունեցել, որ Հայաստանում հեղափոխություն են արել արեւմտամետ ուժերը: Ժամանակի ընթացքում նրանք հասկացել են, որ արեւմտամետ ուժ Հայաստանում իշխանության չի եկել:

«Հիասթափվողների հաջորդ խումբը ռուսամետներն են, որովհետեւ նրանք կամ մտածում էին, որ Ռուսաստանն իր լծակներով թույլ չի տա մեր իշխանության գոյությունը Հայաստանում, կամ ՀՀ իշխանությունը մարիոնետային կդառնա եւ ստիպված կլինի իր իշխանությունը կիսել ռուսամետների հետ: Իրենք հիմա հիասթափված են, որովհետեւ հասկանում են, որ իրենց ընկալած սցենարներից ոչ մեկը չի գործում եւ չի էլ գործելու»,-ասաց նա:

Ըստ Փաշինյանի հաջորդ խումբը, որոնք հիասթափվել է` նախկին օլիգարխիան է: «Օրինակ, այն մարդիկ, որոնք հեղափոխությունից առաջ երթեւեկում էին ավտոշարասյուներով, սրանից բխող հետեւանքներով, հիմա այդպես չեն երթեւեկում: Նրանք էլ սկզբից մտածում էին՝ հեսա իշխանությունը կսկսի իրենց դիմել տարբեր հարցերով, բայց իշխանությունը չի դիմում»: