«Ժողովուրդ». Արմեն Գրիգորյանը կրկին գործուղվեց Արցախ
Հայկական Մամուլ
«Ժողովուրդ» թերթը գրում է. «ՀՀ անվտանգության խորհրդի քարտուղար Արմեն Գրիգորյանը կրկին կայցելի Արցախ։ Պաշտոնյան Ստեփանակերտ կգործուղվի ապրիլի 27-28-ը։ Նկատենք, որ վերջին շրջանում Արմեն Գրիգորյանը հաճախ է այցելում Արցախ։ Ընդ որում, նա Արցախ էր այցելել ոչ միայն մինչեւ համապետական ընտրությունները, այլ նաեւ դրանից հետո՝ մինչեւ նախագահական երկրորդ փուլը։ Այս անգամ պաշտոնական մեկնաբանմամբ Արմեն Գրիգորյանն Արցախ է մեկնում՝ աշխատանքային հանդիպումներ ունենալու նպատակով։ Նկատենք, որ օրեր առաջ Արմեն Գրիգորյանը հանդիպել էր Արցախի ընտրված նախագահ Արայիկ Հարությունյանի հետ՝ Երեւանում, սակայն «Ժողովուրդ» օրաթերթի տեղեկություններով, չի բացառվում, որ մեկ անգամ եւս հանդիպում լինի արդեն Ստեփանակերտում։ Բացի այդ, հանդիպում է նախատեսված նաեւ Արցախի գործող նախագահ Բակո Սահակյանի հետ։ «Ժողովուրդ» օրաթերթը տեղեկացավ, որ հանդիպումները բազմազան են լինելու՝ նաեւ ռազմական իշխանության հետ եւ այն մեկնաբանվում է որպես անվտանգության հարցերի շուրջ քննարկումներ։ Հիշեցնենք, որ Գրիգորյանը Արցախի նախագահի ընտրություններում գրեթե անթաքույց սատարում էր Մասիս Մայիլյանին, որը 5000-ին մոտ ձայն հավաքեց»:
Ամենադիտված 
Հունվարից երևանցին վճարելու է ամենաթանկ սակագինը տրանսպորտային երթևեկության համար
