Բունդեսլիգայի խաղացողներից հնարավոր է պահանջվի դիմակով խաղալ

Գերմանիայի Աշխատանքի և սոցիալական հարցերի նախարարությունն առաջարկել է խաղացողներին պարտադրել խաղի ընթացքում դիմակներ կրել, եթե Գերմանիայի առաջնությունը վերսկսվի, հայտնում է Spiegel-ը:
Հրապարակման համաձայն՝ նախարարությունը առաջարկել է սահմանափակումների երկու տարբերակ, որոնք կարող են ներկայացվել սեզոնը վերսկսելու դեպքում: Դրանցից մեկը ենթադրում է «լիարժեք կարանտին» բոլոր ֆուտբոլիստների, բուժաշխատողների մարզիչների և այլ անձանց համար, ովքեր շփման մեջ են ֆուտբոլիստների հետ: Հավանաբար այս տարբերակը կարող է իրականացվել, եթե վարձակալվում է մեծ հյուրանոցային համալիր:
Մեկ այլ տարբերակ հուշում է, որ խաղացողներն ու մրցավարները ստիպված կլինեն կրել «սպորտային պաշտպանություն բերանի և քթի համար»: Դրանք պետք է լինեն հատուկ դիմակներ, որոնք պետք է ամուր լինեն և չսահեն: Բացի այդ, խաղացողներին արգելվելու է ձեռքերով հպվել դրանց: «Եթե դիմակները սահեն, խաղը պետք է անմիջապես դադարեցվի: Բացի այդ, արագ շնչառության պատճառով դիմակները շատ ավելի արագ կթրջվեն թքարտադրությամբ, դրանք պետք է փոխվեն առնվազն յուրաքանչյուր 15 րոպեն մեկ», - ասել են նախարարությունից:
Առաջարկվում է նաև բացառել խաղացողների ֆիզիկական շփումը ոչ խաղային դրվագներում, օրինակ՝ գոլերի հետո գրկախառնությունը: Ավելի վաղ հաղորդվում էր, որ Գերմանիայի առաջնությունը կարող է վերսկսվել մայիսի 9-ին: