Իսկ ո՞րն է Վաղարշակ Հակոբյանի վաստակը

«Կինը ինքնուրույն, իրավատեր և արժանապատիվ մարդ է»,- Մարդու իրավունքների պաշտպանի 2019թ. զեկույցը ներկայացնելիս՝ Արման Թաթոյանի այս ձևակերպումը դժգոհություն է առաջացրել «Իմ քայլը» խմբակցության պատգամավոր Վաղարշակ Հակոբյանի մոտ: «Մեղմ ասած՝ այս ձևակերպումը ոչ տեղին էր։ 21-րդ դարում, հեղափոխությունից հետո ՄԻՊ-ի զեկույցում կանանց մասին խոսել 2 տողով, այն էլ նշել, որ կինը մարդ է, այն էլ՝ արժանապատիվ, սա անթույլատրելի է: Կարող էիք Ձեր միտքը այլ թեմաների շուրջ կրճատել, բայց կանանց իրավունքների մասին պետք էր ավելի համապարփակ խոսել»,- ասաց նա, ապա ընդգծեց, որ տեռորի են ենթարկում իշխանական կանանց, իսկ ՄԻՊ-ի վերաբերմունքը զրո է: Սակայն նկատենք, որ Մարդու իրավունքների պաշտպանի տարեկան հաղորդման մեջ շուրջ 35 էջ նվիրված է հենց կանանց իրավունքներին վերաբերող հարցերին: Հետևաբար, Վաղարշակ Հակոբյանի ելույթը հիմնավոր չէ, քանի որ նա չի ծանոթացել ՄԻՊ-ի զեկույցին ամբողջությամբ և տեղյակ չէ դրա բովանդակությանը: Սա իմքայլական պատգամավորի այն ելույթներից է, որ քննարկման առարկա դարձավ հանրության շրջանում, բայց ոչ թե հօգուտ պատգամավորի, այլ՝ հակառակը: Շատերը նրան դիտողություն են անում, որ պետք է նախևառաջ ունենալ այն վաստակը, որն ունի Արման Թաթոյանը՝ տարիների ընթացքում կատարած տիտանական աշխատանքի շնորհիվ և հարց են բարձրացնում, թե ի՞նչ է արել Վաղարշակ Հակոբյանը իր պատգամավորական 2 տարիների ընթացքում: Այսպիսով, նշենք, որ զեկույցի 13-րդ բաժնում առանձնացված և ընդգրկված են հետևյալ թեմաները՝ 1. Կանանց նկատմամբ բռնություն և ընտանիքում բռնություն, 1.1. Ընտանիքում բռնության դեպքերի դեմ պայքարի և կանխարգելման հարցում օրենսդրական թերի կարգավորումներ կամ կարգավորումների բացակայություն, 1.2. Կարծրատիպեր, իրավագիտակցության ցածր մակարդակ և անվստահություն պետական մարմինների նկատմամբ, 1.3. Պետության կողմից տրամադրվող ծառայությունների, ինչպես նաեւ պետական մարմինների միջև համագործակցության բացակայություն, 1.4. Ընտանիքում բռնության դեպքերի վերաբերյալ ճշգրիտ վիճակագրական տվյալների բացակայություն, 1.5. Պետական և տեղական ինքնակառավարման մարմինների ու պաշտոնատար անձանց անբավարար մասնագիտական պատրաստվածություն եւ իրազեկման պակաս, 2. Թրաֆիքինգ և շահագործում, 3. Պտղի սեռով պայմանավորված հղիության արհեստական ընդհատումներ, 4. Կանանց մասնակցությունը քաղաքական եւ հասարակական կյանքին, 5. Առողջության պահպանման իրավունքի սահմանափակման խնդիրներ, 6. Աշխատանքային իրավունքների սահմանափակման խնդիրներ: