Ռուսաստանի խոշորագույն քիմիական գործարաններից մեկը վաճառվել է գրոշներով

Օմսկի շրջանի դատախազությունը հակամոնոպոլիստական ծառայության հետ համատեղ ստուգումների է ենթարկել սնանկ «Օմսկ-պոլիմեր» ԲԲԸ գույքի վաճառքի օրինականության կապակցությամբ, որը կազմել է 100 միլիոն ռուբլի՝ համարժեք սկզբնական գնի 10 տոկոսին։ Հինգշաբթի Հակամոնոպոլիստական ծառայությունը այդ գործարքը չեղյալ է հայտարարել։

Ավելի վաղ ՌԴ Դատախազությունը քրեական գործ էր հարուցել սնանկացած «Օմսկ-պոլիմեր» ԲԲԸ-ի դեմ։ Գործարանի նախկին տնօրենը կասկածվում է 17,7 մլն ռուբլու հարկային պարտավորությունից խուսափելու մեջ:

Օմսկի երկրամասի միջնորդ դատարանը 2010թ. նոյեմբերի 30-ին «Օմսկ-պոլիմեր»-ը ճանաչել է սնանկ և նրա նկատմամբ ներկայացվել է մրցութային վարույթ: Գործարանի ընդհանուր պարտքի չափը կազմում է առավելագույնը 7 մլրդ. ռուբլի։ Ըստ Դատախազության ունեցած տվյալների՝ «Օմսկ-պոլիմեր»-ի բաժնետոմսերի կենտրոնական փաթեթը պատկանում է «Laplaus Group» Ltd սեփականատեր Մուխտար Աբլյզովին։

Դատախազության աշխատակիցները պարզել են, որ վերոնշյալ ընկերությունը դեռ 2006թ. գնել է 3 ընկերությունների 1,8 մլրդ ռուբլի ընդհանուր արժեքով չապահովագրված պարտատոմսեր և իր փողերը ետ չի պահանջել: Ստուգողները պարզել են՝ «Ձեռնարկության ղեկավարությունը կատարել է ակտիվները դուրս տանելու որոշ գործողություններ, որոնք առաջացրել են կրեդիտորական պարտքեր՝ ընդհանուր առմամբ ավելի քան 7 մլրդ. ռուբլու չափով, որն էլ սնանկանալու պատճառ է դարձել»:

Ընկերության պատմությունը սկիզբ է առել 1968 թվականին, երբ Օմսկում բացվել է պլաստմասսայի գործարանը։ Իսկ 90-ականների կեսերին ձեռնարկությունը ձեռնամուխ է եղել պոլիստերինե ժապավենի և միանգամյա օգտագործման սպասքի արտադրությանը «Պոլիմեր-Պակ» ապրաքանշանի ներքո։