ՀՀ սփյուռքի նախարարն ընդունեց «Բազե–2012»-ի մասնակից սփյուռքահայ երիտասարդներին

Օգոստոսի 23-ին ՀՀ սփյուռքի նախարար Հրանուշ Հակոբյանն ընդունեց «Բազե–2012» ամենամյա համահայկական երիտասարդական հավաքի մասնակից սփյուռքահայ երիտասարդներին:

«Բազե-2012» համահայկական երիտասարդական 10-րդ հոբելյանական հավաք-ծրագրին ՀՀ սփյուռքի նախարարության աջակցությամբ մասնակցեց երեք ջոկատ՝ Հայաստանի սփյուռքահայ ուսանողների խորհրդի, ՌԴ Կրասնոդարի երկրամասի հայկական երիտասարդական կազմակերպությունների և Ջավախքի ջոկատները, որոնք ընդգրկված էին կարմիր, կապույտ և նարնջագույն ճակատներում:

Ողջունելով սփյուռքահայ երիտասարդներին՝ տիկին Հակոբյանը նախ շնորհավորեց նրանց Հայաստանի Անկախության մասին հռչակագրի ընդունման 22-րդ տարելիցի առթիվ, ապա իր գոհունակությունը հայտնեց ինչպես մարզական մրցույթներում գրանցված բազմաթիվ հաջողությունների, այնպես էլ ինտելեկտուալ խաղերին (բրեյն ռինգ), մշակութային (երգ, պար, նորաձևություն, նկարչություն) մրցույթներին ակտիվ մասնակցելու համար:

Երիտասարդները նախարարին պատմեցին հավաքի ընթացքում մրցանակներից ու մեդալներից զատ ձեռքբերումների' նոր ընկերների, զգացողությունների ու գիտելիքների մասին:

Սփյուռքահայ երիտասարդների անունից շնորհակալություն հայտնելով տիկին Հակոբյանին ջերմ ընդունելության, մշտառկա հոգատար վերաբերմունքի և աջակցության համար՝ սփյուռքահայ ուսանողների խորհրդի նախագահ և ջոկատի ղեկավար Սամվել Մկոյանը նշեց, որ սեպտեմբերը աշխատանքային բուռն շրջան է լինելու՝ սկսվելու են հայերենի դասընթացները:

Նախարարը սփյուռքահայ պատանիներին և աղջիկներին պատվիրեց իրենց բնակության երկրներ վերադառնալուն պես զբաղվել համայնքներում այն երիտասարդների ցուցակագրմամբ, ովքեր դեռ Հայաստանում չեն եղել, և ակտիվորեն ներգրավվել ՀՀ սփյուռքի նախարարության կողմից իրականացվող համահայկական ծրագրերին: Նախարարը նաև հորդորեց նրանց այսուհետ տանը և շրջապատում խոսել, մշտապես կարդալ և գրել հայերեն:

ՀՀ սփյուռքի նախարար Հ.Հակոբյանը սփյուռքահայ բազեականներին կոչ արեց իրենց միջավայրում դառնալ այն բջիջը, որը կհամախմբի իր շուրջը տեղի հայությունը և կդարձնի այն հոգեպես առավել ուժեղ և ոգեղեն: