ԲՀԿ-ն պատրաստ է բոլոր սցենարներին․ Նաիրա Զոհրաբյան

ԲՀԿ-ն պատրաստ է բոլոր հնարավոր սցենարներին, բոլոր հնարավոր զարգացումներին, պատրաստ ենք նրան, որ մեզ կարող են կալանավորել, գալ ԱԺ, զրկել անձեռնմխելիությունից զրկել:  Այս մասին այսօր՝ հունիսի 14-ին, ԱԱԾ շենքի դիմաց լրագրողների հետ զրույցում ասաց ԲՀԿ պատգամավոր Նաիրա Զոհրաբյանը։

«Կարող են տարբեր քրեական գործեր հարուցել, կարող են բոլորիս անձնական կյանքեր քիթները խոթել, կարող են շանտաժներ իրականացնել, սակայն ոչ մի գործիք չի ազդելու, որովհետեւ հարգարժան իշխանություն, դուք անցել եք բարոյականության կարմիր գիծը, անցել եք հնարավոր կարմիր գծերը։ Կարծում եմ, որ դուք վերջին հնարավորությունն ունեք Հայաստանում գործընթացները չդարձնելու անդառնալի եւ անշրջելի»,- ասաց ԲՀԿ պատգամավորը։

Դիտարկմանը, որ երկրում արտակարգ դրություն է, եւ վտանգավոր է հավաքներ իրականացնել, Զոհրաբյանն ասաց. «Ինչպես նշեց վարչապետը, համաճարակը կարող մեկ կամ երկու տարի տեւել, մենք պիտի հասկանանք, որ չենք կարող այդքան ժամանակ Հայաստանում ոտնահարել մարդու հիմնարար իրավունքները։ Մարդիկ իրավունք ունեն ունենալու անհամաձայնություններ»։

Հարցին՝ արդյոք ԲՀԿ-ն՝ մինչեւ քաղխորհրդի նիստ անցկացնելը տեղյա՞կ է եղել հարուցված քրեական գործերի մասին, Զոհրաբյանն ասաց․ «Ոչ, տեղյակ չենք եղել։ Եթե ձեզ թվում է, քրեական գործերով հնարավոր է պարոն Ծառուկյանի կամ մեզնից որեւէ մեկին վախեցնել, ապա մենք մեր հատուկ նիստը չէինք անի։ Միանշանակ կանխատեսում էինք, որ այդ գործերը լինելու էր բոլոր մեր գործընկերների նկատմամբ»։

Հարցին՝ ի՞նչ են առգրավվել Ծառուկյանի առանձնատնից, պատգամավորն ասաց. «Ինչ-որ թղթեր էր, բայց ինձ հաջողվեց մի բան տեսնել, Ծառուկյանի որդու հարսանիքի հրավիրատոմսը տեսա, որը հետաձգվում է։ Հարսանիքի հրավիրատոմսից ինչ առավել կարեւոր «կրիմինալ» փաստաթուղթ են առգրավվել, ես տեղյակ չեմ»։