Մեղավորները պատասխանատվության են ենթարկվելու.Արայիկ Հարությունյան

Արցախի Հանրապետության նախագահ Արայիկ Հարությունյանը հունիսի 15-ին աշխատանքային ընդլայնված խորհրդակցություն է հրավիրել հանրապետության անտառային տնտեսության որոշ հատվածներում հայտնված «անզույգ մետաքսագործներ» կոչվող թրթուրների պատճառած վնասների գնահատման ու պայքարի միջոցների ձեռնարկման թեմայով: Այս մասին տեղեկացնում է ԱՀ նախագահի աշխատակազմի տեղեկատվության գլխավոր վարչությունը: 

«Խորհրդակցությանը մասնակցում էին ԱՀ գյուղատնտեսության, տարածքային կառավարման ու զարգացման նախարարները, բնապահպանության կոմիտեի նախագահը և ոլորտի այլ պատասխանատուներ:

Զեկուցմամբ հանդես է եկել բնապահպանության կոմիտեի նախագահ Ֆելիքս Գաբրիելյանը, ով մասնավորապես նշել է, որ այդ վնասատուների դեմ արդյունավետ պայքարի ժամանակը վաղ գարնան շրջանն է. այն պետք է իրականացնել ավիացիոն սրսկումների եղանակով: Կոմիտեի նախագահի խոսքով՝ ներկա փուլում այդ թրթուրների դեմ պայքարն արդյունավետ չէ, քանի որ լայն տարածում են գտել, բացի դրանից, կենսաբանական փոփոխության հետևանքով շուտով դրանք այլևս ակտիվ չեն լինի:

Երկրի ղեկավարը շատ խիստ է արձագանքել տրված պարզաբանումներին՝ նշելով, որ ստեղծված իրավիճակը ոլորտի պատասխանատուների՝ ժամանակին թույլ տված թերացումների հետևանք է: Նա հանձնարարել է կարճ ժամանակում մասնագիտական հանձնաժողով ձևավորել, ուսումնասիրել վնասների չափը, հստակեցնել պայքարի միջոցների մշակման եղանակները՝ ընդգծելով, որ բոլոր մեղավորներն օրենքի առաջ պատասխանատվություն են կրելու»,-նշված է հաղորդագրությունում: