Ինչո՞ւ ՀՀԿ-ի հետ կապված ընտրախախտումների վերաբերյալ իրավական ընթացք չի տրվում

Նախ, որեւէ մեկը չի կարող ասել, որ դրա հետ կապված գործեր չեն լինի եւ հենց ձեր նշած գործերի հետ կապված մենք քննությունների ականտես չենք լինի։ Այս մասին այսօր լրագրողների հետ զրույցում ասաց ԱԺ փոխնախագահ Ալեն Սիմոնյանն՝ անդրադառնալով այն հարցին, թե ինչո՞ւ ՀՀԿ-ի հետ կապված ընտրախախտումների, ընտրակաշառքի վերաբերյալ ահազանգերին իրավական ընթացք չի տրվում։

«Երկրորդ, կոնկրետ մեկ պաշտոնյայի հետ կապված քրեական գործի շրջանակներում գտնվել է հաշվետվություն եւ դրան ընթացք է տրվել եւ քրեական գործ է հարուցվել: Ի՞նչ ասել է՝ եթե մեկի հետ կապված քրգործ չկա, ինչի՞ մյուսի հետ կապված կա: Մենք չենք կարող մեկը մյուսի հետ համեմատել եւ դրա հիման վրա էն մեկի հետ կապված որեւէ գործողություն չանել:

Ի վերջո, երկու տարբեր մեխանիզմ է գործել. մի պարագայում եղել է աշխատանքի մի ձեւ, օրինակ, պատգամավորների թեկնածուներն իրենք են հոգացել ընտրակաշառքի ծախսերը եւ ձայների միջոցով ձեւավորել են  վերաբերմունք իրենց ղեկավարի մոտ եւ, ըստ արժանվույն, ստացել իշխանության իրենց մասնաբաժինը: Դրա վառ ապացույցն է ռեյտինգային համակարգով ստեղծված ընտրական օրենսգիրքը, որն արվել է նրա համար, որ ընտրություններից հետո հասկանան, թե ով ինչքան ձայն է բերել կոնկրետ այդ կուսակցությանը:  Եվ եղել է մեկ այլ տարբերակ, երբ գումարը տրվել է, որպեսզի այդ տարածաշրջանում գործողություններ կատարվեն եւ դրա դիմաց ներկայացվել է հաշվետվություն: Սրանք երկու տարբեր մեխանիզմներ են, որոնք աշխատել են Հայաստանում:

Ինչ վերաբերում է ՀՀԿ-ի հետ կապված, թող որեւէ մեկը չկասկածի, հերթով դեպքերը բացահայտելու ենք: Կարող էր լինել նաեւ հակառակը, օրինակ լիներ Սերժ Սարգսյանի ելույթը Զագրեբում, դրանից ասենք մեկ ամիս հետո ՀՀԿ-ի հետ կապված ինչ-որ քրեական գործ լիներ, դուք ինձ ասեիք՝ բա էլի կուսակցություններ են եղել, որոնց հետ կապված մամուլում հրապարակումներ են եղել, ինչո՞ւ նրանց հետ կապված գործեր չկան, նրանք ինչ-որ ձեզ հետ ինչ-որ ձեւով համագործակցո՞ւմ են։ Պետք չի փոչձել գտնել մի բան, որն իրականության մեջ չկա»:

Դիտարկմանը, որ օրինակ, նախկինում ՀՀԿ-ական պատգամավոր հայտնի գործարար Սամվել Ալեքսնյանի հետ կապված նման գործեր չկան, Ալեն Սիմոնյանն ասաց. «Որեւէ մեկը ապահովագրված չի: Նույն հաջողությամբ Էդմոն Մարուքյանը ասում էր՝ ինչո՞ւ Գագիկ Խաչատրյանի հետ կապված ոչ մի գործ չկա: Չեք կարող միանգամից բոլորի հետ կապված գործեր լինեն: Դրանք  քրեական գործեր են, ժամկետներ ունեն, հիմքերի հիմնավորվածության խնդիր կա: Ես հասկանում եմ, որ բոլորն ուզում են, որ ում անունը երբեւիցե լսել են, նրանց վերաբերյալ հրապարակում է եղել, ուզում են մեկ ժամվա մեջ հրապարակում այրվեն: Ոչ Սամվել Ալեքսանյանը, ոչ որեւէ մեկը, ոչ Ալեն Սիմոնյանը, եթե իրենց հետ լինեն փաստեր, չեն խուսափելու, իսկ գործընթացը շարունակվելու է»: