Կեղծարարը խոսում է ստի՞ց. Alternativ.am

Alternativ.am-ը գրում է. ««Լուսավոր Հայաստան» խմբակցության ղեկավար Էդմոն Մարուքյանն այսօր ճեպազրույցի ընթացքում Ռոբերտ Քոչարյանի պաշտպանական թիմի բնորոշումը սուտ որակեց: ԱԺ-ում տեղի ունեցած ճեպազրույցի ընթացքում Մարուքյանը, դիմելով լրագրողներին, ասաց հետևյալը. «Ձեզ խաբել են, նախապայման չկա: Դա սուտ է»: Մարուքյանը նման հայտարարությամբ հանդես եկավ ի պատասխան փաստաբաններ Օրբելյանի ու Վարդևանյանի հայտարարության, թե «Լուսավոր Հայաստան» խմբակցությունն արդեն կարող է դիմել ՍԴ, քանի որ այն նախապայմանը, որը կապված էր ՍԴ-ում նախագահ Քոչարյանի գործի քննության հետ, արդեն վերացել է:

Ստի ու խաբեության մասին խոսող Էդմոն Մարուքյանի՝ պատգամավորական գործունեության մեկնարկի մասին մի դրվագ հիշեցնենք:

2012 թվականին, երբ Էդմոն Մարուքյանը պատգամավորական թեկնածություն էր առաջադրում, վերջինս չէր բավարարում պատգամավոր դառնալը համար նախատեսված կարևորագույն պայմաններից մեկին՝ նա 5 տարի անընդմեջ ՀՀ-ում չէր բնակվել:

Սակայն ըստ «Առավոտ» օրաթերթի հրապարակման՝ «Մարուքյանին տրամադրվել է Հայաստանում 5 տարվա անընդմեջ բնակության կեղծ փաստաթուղթ. Մարուքյանը 2009-ի օգոստոսից մինչև 2010-ի հուլիսը Մարուքյանը Հայաստանում չի բնակվել, քանի որ արտերկրում կրթվելիս է եղել:

Ըստ նույն հրապարակման՝ Մարուքյանը, պարզվում է, կիրառել է փաստաթուղթ կեղծելու հայտնի հնարքը` «Հայաստանից ԱՄՆ նա մեկնել է իր անձնագրով, իսկ ԱՄՆ-ում համապատասխան մարմիններին իրազեկել, թե կորցրել է անձնագիրը»։ Ապա վերջինիս նոր անձնագիր են ուղարկել ՀՀ-ից, որտեղ արդեն չի արձանագրված այն կետը, թե Մարուքյանը Հայաստանում չի բնակվել գրեթե մեկ տարի, փոխարենը գտնվել է ԱՄՆ-ում: Այս արարքով Մարուքյանը խախտել է ոչ միայն Հայաստանի, այլև ԱՄՆ օրենսդրությունը:

Ստացվում է, որ կեղծարարության արդյունքում պատգամավորական մանդատ ձեռք բերած Էդմոն Մարուքյանն այսօր ուրիշներին է մեղադրում ենթադրյալ ստի ու կեղծիքի տարածման մեջ՝ այլ տարբերակ չունենալով նախագահ Քոչարյանի փաստաբանների խոսքերը մեկնաբանելու կամ էլ արդարանալու համար:

ԱԺ «Լուսավոր Հայաստան» խմբակցության առաջարկած նախապայմանը, թե կմիանան ՍԴ դիմելու «Բարգավաճ Հայաստան» խմբակցության դիմումին հուլիսի 7-ից հետո, երբ Քոչարյանի վերաբերյալ գործը ՍԴ-ն կքննի, արդեն անհիմն է, քանի որ Քոչարյանի պաշտպանների դիմումն այլևս ՍԴ-ում չի քննվելու: ԼՀԿ-ն այլևս չի կարող արդարացումներ փնտրել, դրանք հրամցնել հասարակությանը, թե պատճառը զուտ այն է, որ չեն ցանկանում, որպեսզի իրավական գործընթացներին քաղաքական ենթատեքստ տրվի: Բայց իրականությունն այլ է՝ ակնհայտ է, որ Էդմոն Մարուքյանի ղեկավարած քաղաքական ուժը ՍԴ դիմելու նվազագույն ցանկություն կամ նպատակ չունի, քանի որ առկա է ներքին համաձայնություն վարչապետ Նիկոլ Փաշինյանի հետ. չդիմել ՍԴ, ինչ-ինչ պատճառաբանություններ բերել ու սպասել որոշ ժամանակ, մինչև ՍԴ ներկայիս կազմը կփոխվի, ապա ձեռնարկել ՍԴ դիմելու գործընաց:

Ընդդիմադիր քաղաքական ուժ հռչակված «Լուսավոր Հայաստանն» իր այս քայլով ապացուցեց, որ Նիկոլ Փաշինյանի գրպանային ընդդիմությունն է, որ ձևական բնույթ է կրում ընդդիմադիրների շարքում և արդեն իսկ անթաքույց սատարում է Փաշինյանին ու «Իմ քայլին»»: