Մեղադրվում է Պուտինի դեմ մահափորձի մեջ

ՌԴ նախագահ Վ. Պուտինի դեմ մահափորձի կազմակերպման մեջ կասկածվող Իլյա Պյանզինն Ուկրաինայից հատուկ չվերթով տեղափոխվել է Ռուսաստան և այժմ գտնվում է «Լեֆորտովոյի» բանտում։ Հենվելով հատուկ ծառայություններում իրենց աղբյուրի վրա՝ այս մասին հաղորդում է «РИА Новости»-ն:

Լրատվական գործակալությունը տեղեկացնում է նաև, որ գործը գտնվում է ՌԴ Դաշնային անվտանգության ծառայության քննչական վարչության վարույթում:

Հիշեցնենք, որ ընթացիկ տարվա փետրվարին Ռուսաստանի և Ուկրաինայի հատուկ ծառայությունները հաղորդել էին Օդեսայում Իլյա Պյանզինին և Ադամ Օսմաևին կալանավորելու մասին: Վերջինս դեռևս 2007թ.-ից Չեչնիայի նախագահ Ռամզան Կադիրովի դեմ մահափորձ կազմակերպելու մեղադրանքով գտնվում էր միջազգային հետախուզման մեջ: Իսկ Վ. Պուտինի դեմ նախապատրաստվող մահափորձի մասին, որը պետք է տեղի ունենար մարտ ամսին, ՌԴ նախագահի ընտրություններից անմիջապես հետո, Օսմաևը խոստովանել է անձամբ, և այդ դրվագը փետրվարի 27-ին ցուցադրվել է համառուսաստանյան 1-ին հեռուստաալիքով:

Նշենք, որ օգոստոսի 21-ին մարդու իրավունքների եվրոպական դատարանը Ուկրաինային արգելել է Օսմաևին հանձնել ռուսական իրավապահ մարմիններին՝ մինչև իր կողմից նրա հետ կապված գործի ուսումնասիրության հիման վրա եզրակացություն տալը: Եթե միջազգային այս կառույցը գտնի, որ Օսմաևին Ռուսաստանին հանձնումը հակասում է եվրոպական կոնվենցիային, ապա վերջինիս դատը տեղի կունենա Ուկրաինայում։