Սփյուռքի նախարարը մասնակցեց սիրիահայերի համար կազմակերպված դասընթացներին

Օգոստոսի 27-ին ՀՀ սփյուռքի նախարար Հրանուշ Հակոբյանն այցելեց Ս. Շահումյանի անվան թիվ 1 դպրոց, որտեղ անցկացվում են արևելահայերենի արագացված դասընթացներ սիրիահայերի համար:

Դասերը, որոնց մասնակցում է շուրջ 50 սիրիահայ, ընթանում են 3 խմբով՝ երկուշաբթիից ուրբաթ՝ ժամը 9:30-13:00:

Տիկին Հակոբյանը Երևանի քաղաքապետարանի հանրակրթության վարչության պետ Գայանե Սողոմոնյանի ուղեկցությամբ մասնակցեց երեք խմբերի ուսումնական պրոցեսին, զրուցեց արևելահայերեն սովորող սիրիահայերի հետ: Նախարարի այն հարցին, թե ինչն է նպաստել արևելահայերեն սովորելու ցանկությանը, դասընթացի մասնակից Նվարդ Պողիկյանը (Հալեպ) պատասխանեց. «Կրթության նկատմամբ հատուկ սերը և Հայրենիքում հիմնավորվելու մեծ ցանկությունս»:

Զրույցի ընթացքում պարզվեց, որ մեծամասամբ յուրացվել են արևելահայերենի քերականության օրենքները, արևելահայերեն և արևմտահայերեն լեզուների քերականական ակնհայտ տարբերությունները: Ներկայումս սիրիահայերի կողմից առավելապես բարձրաձայնվում են բանավոր խոսքում բաղաձայն հնչյունների արտաբերման տարբերությունների դժվարությունները, որոնք էլ կհաղթահարվեն ժամանակի և շփումների ընթացքում:

Շնորհակալություն հայտնելով ՀՀ սփյուռքի նախարարությանը և Երևանի քաղաքապետարանին ուսումնական գործընթացը արագ և արդյունավետ կազմակերպելու, նաև հայաստանյան կյանքին ինտեգրվելու գործում աջակցության համար' սիրիահայ Անդրանիկ Վարդանյանը հուզումով կատարեց Ա.Սաթյանի «Մարտիկի երգը» և հավելեց. «Մենք այն թռչուններն ենք, որոնց արմատն ամուր է, և ի վերջո վերադարձանք մեր բույնը»:

Ցածր տարիքային խմբի դասարանում ՀՀ սփյուռքի նախարարը անհատապես ծանոթացավ աշակերտներից յուրաքանչյուրին:

Ավագների խմբում խնդիրներն առավել առարկայական էին. սիրիահայերը մեկ անգամ ևս բարձրացրին անձնագրերի, մուտքի արտոնագրերի ժամկետների, կրթության պայմանների և աշխատավայրերի վերաբերյալ հարցադրումներ: Նախարար Հակոբյանը պատասխանեց բարձրացված յուրաքանչյուր հարցին, ներկայացված խնդիրները ուղղորդեց համապատասխան գերատեսչություններ: Բացի ծրագրային աջակցությունից, որն ամեն օր իրականացնում է գերատեսչությունը, նախարարն առաջարկեց մի շարք իրավիճակային լուծումներ:

Մանկավարժ Էմմա Վարդանյանի հավաստիացմամբ` երեխաները մեծ ոգևորությամբ են սովորում մեր ոսկեղենիկ մայրենիի մյուս ճյուղը` արևելահայերենը: Հյուրերի համար նրանք հոտնկայս կատարեցին «Էրեբունի-Երևան» երգը:

Տիկին Հակոբյանը տեղեկացրեց նաև, որ արդեն շուրջ 15 սիրիահայ մանկավարժներ են հաշվառվել, որոնք ցանկություն են հայտնել ներգրավվել կրթական գործընթացում և դասավանդել սիրիական ծրագրով ուսուցմամբ դասարաններում:

Հանդիպման ավարտին նախարարը ոգևորեց այն երեխաներին, որոնք նպատակադրվել են իրենց կրթությունը շարունակել հայկական դպրոցներում և իրենց ապագան պատկերացնում են միմիայն Հայաստանում: Նախարար Հ.Հակոբյանը խոստացավ սիրիահայ աշակերտներին հայկական դպրոցներում հանդիպել ուսումնական տարվա ընթացքում: