Եղեգնուտցիների խնդրի հասցեատերը մարզպետարանը չէ. Համբարձում Մաթևոսյան

Մեր կայքը մի քանի օր է` ներկայացնում է Եղեգնուտում ծավալվող իրադարձությունները:

Մարդիկ բարիկադներ են կազմել և փակել ճանապարhները: Պահանջը մեկն է՝ հնին վերադարձ չկա, հին ու մերժված գյուղապետն այլևս չպետք է պաշտոնավարի:

Արմավիրի մարզպետ Համբարձում Մաթևոսյանը ԼՈՒՐԵՐ.com-ի հետ զրույցում ասաց, որ իր նախաձեռնությամբ  բազմիցս ունեցել են հանդիպումներ, քննարկումներ բողոքող կողմերի հետ, իսկ Ռազմիկ Մարգարյանի հետ ինքը հանդիպել է ընդամենը երկու անգամ: «Երեկ եղեգնուտցիներին կանչել եմ հանդիպման, բայց մերժել են:  Գործը ուղիղ չի վերաբերում մարզպետարանին, դատական ակտն ինքնին վերաբերվում է Եղեգնուտի նախկին համայնքապետին և ժամանակավոր պաշտոնակատարին»,-ասաց մարզպետը:

Համբարձում Մաթևոսյանը ընդգծում է, որ այն թյուր ըմբռնումները և խոսակցությունները, թե ինքն է վերականգնել նախկին համայնքապետին, չեն համապատասխանում իրականությանը. «Մարզպետը լիազորված չէ նոր համայնքապետ նշանակելու. ես այս դատական ակտով որևիցե մեկին պաշտոնում չեմ վերականգնել և չեմ նշանակել. պարզապես վերցրել եմ դատական ակտը  և փոխանցել եմ համայնք՝ ի կատարման»:

ԼՈՒՐԵՐ.com-ի այն հարցին, թե ճիշտ է արդյոք, որ եղեգնուտցիներն իրեն դատի են տվել, Մաթևոսյանը հերքեց. «Ինձ որևիցե մեկը դատի չի տվել,  չեն էլ կարող տալ, որովհետև ես լիազորություն չունեմ՝ կատարելու իրենց պահանջը»:

Մաթևոսյանը կարևորում է, որ Եղեգնուտում  ամենամեծ, ծավալային աշխատանքները կատարվել են հենց իր պաշտոնավարման օրոք, և իր անմիջական միջամտության շնորհիվ  բազմաթիվ ծրագրեր են իրականացվել համայնքում․ խոսքը վերաբերում է ասֆալտաշինությանը, լուսավորությանը, բարեկարգ ճանապարհներ ունենալուն, ոռոգման համակարգին, խմելու ջրին: Ըստ մարզպետի՝  գյուղացիները սա չեն թաքցնում: Օր ու գիշեր իր թիմի հետ աշխատել է, որպեսզի ծրագրերը հասնեն համայնք: Գյուղական համայնքների մեջ ֆինանսական առումով ամենամեծ աշխատանքները պետք է իրականացվեր Եղեգնուտ համայնքում: 

«Երբ ես նշանակվել եմ մարզպետ, համայնքն արդեն ուներ  Ժ/Պ: Ես կարող էի Ժ/Պ-ին փոխել հասարակ  արձանագրությամբ, բայց ես երկու տարի  այդ քայլին չեմ գնացել, քանի որ հաշվի եմ առել, որ համայնքում ամենակարևորը  ոչ թե պաշտոնավարող գյուղապետն է, ոչ թե մարզպետի կամ քաղաքական թիմի շահերն են, այլ եղեգնուտցիների շահերը»,-նշում է մարզպետը և հավելում, որ  ամբողջ  մարդային ռեսուրսները մեկտեղել են, որպեսզի համայնքում իրականացնեն մեծ կարևորության խնդիրների լուծման ծրագրերը:

«Կապ չունի մարդիկ ինչ են ասում և մարզպետն ինչ է ցանկանում. մենք գործում և աշխատում ենք իրավական երկրում, որտեղ վերջին խոսքը մնում է օրենքի տառին. օրենքն ասում է, որ մարզպետը Ժ/Պ նշանակելու լիազորություն չունի այս պահին,  քանի որ դատական ակտ է հասնում հետևյալով. անվավեր ճանաչել նախկին մարզպետի ժամանակավոր պաշտոնակատար նշանակելու որոշումը, քանի որ նախկին համայնքապետի  հրաժարականը չի եղել իրավական նորմերին համապատասխան. հիմա ի՞նչ կապ ունի մարզպետը, եթե Վերաքննիչ դատարանն է կայացրել որոշումը, որը անբեկանելի է, և ենթակա է կատարման՝ հրապարակելուց անմիջապես հետո»,-ընդգծեց Մաթևոսյանը:

Մարզպետը նշում է, որ եղեգնուտցիները սխալ ուղու վրա են. այս հարցի հասցեատերը մարզպետարանը չէ. «Իրենք պահանջում են, որ ես Վերաքննիչ դատարանի որոշումը ճանաչեմ անվավեր, այնինչ, ես չունեմ նման լիազորություն: Որոշումը չկատարելու դեպքում և՛ ես, և՛ համայնքի ղեկավարը ենթարկվելու ենք պատասխանատվության: Հիմա դժվա՞ր է  այսքանը հասկանալ, ձեռք ձեռքի բռնել, թվարկված ծրագրերն իրականացնել համայնքում, մինչև մյուս տարի տեղի ունեցող ընտրությունները, որում եղեգնուտցիները հնարավորություն կունենան ընտրելու իրենց նախընտրած թեկնածուին»,- եզրափակեց մարզպետը:

Արփինե Հակոբյան