Սփյուռքի նախարարը հանդիպեց ՄԱԿ-ի մանկական հիմնադրամի ներկայացուցչի հետ

Օգոստոսի 28-ին ՀՀ սփյուռքի նախարար Հրանուշ Հակոբյանը հանդիպեց ՄԱԿ-ի մանկական հիմնադրամի ներկայացուցիչ Հենրիեթ Արենսին: Հանդիպման առանցքում էին Հայաստան ժամանած սիրիահայերի, և հատկապես երեխաների հիմնահարցերը: Նախարարի ներկայացմամբ սիրիահայերի հիմնախնդիրները, ՀՀ Նախագահ Սերժ Սարգսյանի հանձնարարությամբ, գտնվում են ՀՀ կառավարության անընդմեջ հսկողության և ուշադրության ներքո: Նախարարը խոսեց արդեն իսկ իրականացված և ընթացքում գտնվող ծրագրերի, սիրիահայերին պետական մակարդակով տրվող արտոնությունների և աջակցության մասին: ՄԱԿ-ի մանկական հիմնադրամի ներկայացուցիչ Հենրիեթ Արենսը հիմնադրամի անունից գործակցության և աջակցության պատրաստակամություն հայտնեց, հատկապես սիրիահայ երեխաների հետ տարվող աշխատանքներում: Հանդիպման ընթացքում ներկայացվեց սիրիահայերի կրթական, առողջապահական, սոցիալական հիմնախնդիրների մի ողջ շարք, քննարկվեց հնարավոր գործակցության եզրերի լայն շրջանակ:

Հիմնադրամի ներկայացուցիչ Հենրիեթ Արենսը նշեց, որ ՀՀ սփյուռքի նախարարի հետ հանդիպման և զրույցի արդյունքում ստացված տեղեկատվությունը կներկայացվի ՄԱԿ-ի մանկական հիմնադրամի ողջ կառույցին, այնուհետև կսահմանվեն համագործակցության հնարավոր տարբերակները և ծրագրերը:

ՀՀ սփյուռքի նախարար Հ. Հակոբյանը հույս հայտնեց, որ ձեռք կբերվի արդյունավետ համագործակցության տանող պայմանավորվածություն, որի յուրաքանչյուր ծրագիրը կգործի ի նպաստ սիրիահայ երեխաներին բարեկեցության: