Բողոքի ցույց Վաշինգտոնում` Հունգարիայի դեսպանատան առջև

Ադրբեջանցի սպա Ռամիլ Սաֆարովի Բաքու տեղափոխվելու մասին տեղեկատվությունը ստանալուց ժամեր անց ԱՄՆ-ի մայրաքաղաքի հայ համայնքի մի քանի ներկայացուցիչներ ինքնաբուխ բողոքի ակցիա կազմակերպեցին Վաշինգտոնում Հունգարիայի դեսպանատան առջեւ:

«Ամոթ Հունգարիային», «Հունգարիան աջակցում է կացնահարներին», «Արյունոտ փողերը ձեզ չեն փրկի», «Հունգարիայում արդարադատությունը 2 միլիարդ դոլար արժե» եւ մի քանի այլ ցուցապաստառներով բողոքի ակցիայի կազմակերպիչները դեսպանատան առջև մոտ 3 ժամ անցկացրեցին: Մինչ այդ ցուցարարների՝դեսպանությունից բացատրություն ստանալու նպատակով էլեկտրոնային նամակներն ու հեռախոսով կապ հաստատելու փորձերն ապարդյուն անցան:

Բողոքի ակցիայի վերջում դեսպանատան տարածքում հայտնվեց ԱՄՆ-ի հատուկ ծառայությունների մի աշխատակից, ով պարզապես գրանցեց ցույցի կազմակերպիչների անունները, նշելով, որ պաշտպանության համար ահազանգ է ստացվել դեսպանությունից: Ցույցի ավարտին Վաշինգտոնում գործող «Արմենիան ռեփորթր» թերթի գլխավոր խմբագիր Էմիլ Սանամյանը հանդես եկավ հայտարարությամբ, որում նշեց, թե Ռամիլ Սաֆարովին Ադրբեջանին հանձնելու Հունգարիայի իշխանությունների որոշումը նշանակում է, որ այդ երկրում հայտնված արտասահմանցիներն այլեւս անվտանգ չեն կարող զգալ իրենց, քանի որ «Հունգարիայում մարդասպաններն իշխանությունների կամքով ազատ են արձակվում»:

Ի դեպ, ԱՄՆ-ի Ազգային անվտանգության խորհրդի կողմից նույն օրը հրապարակվեց խնդրի վերաբերյալ նախագահի հայտարարությունը, որում նշվում է, որ Բարաք Օբաման խորապես մտահոգված է Ռամիլ Սաֆարովի նկատմամբ Ադրբեջանի նախագահի կայացրած ներման որոշումով: «Այս գործողությունը խոչընդոտում է տարածաշրջանային անվտանգությունն ու հաշտեցման հեռանկարները»,-ասված է հայտարարության մեջ: Նշվում է նաև, որ Միացյալ Նահանգները բացատրություն է պահանջել Հունգարիայից Սաֆարովին Ադրբեջանի իշխանություններին հանձնելու որոշման վերաբերյալ:

Ավելի ուշ Ադրբեջանի իշխանությունների որոշման վերաբերյալ հայտարարությամբ հանդես եկավ նաեւ ԱՄՆ-ի Կոնգրեսի արտաքին հարաբերությունների հանձնաժողովի բազմամյա անդամ Բրեդ Շերմանը: Հայտարարության մեջ ասված է հետեւյալը. «Ես իմ ձայնն եմ բարձրացնում մեր գործընկեր եւ դաշնակից Հայաստանի Հանրապետության խաղաղության եւ անվտանգության վերականգնման համար: Կոչ եմ անում Ադրբեջանի կառավարության արդարադատության առջև կանգնեցնել հանցագործ Սաֆարովին: Նման վարքագիծն ապացուցում է այն փաստը, որ Բաքուն չի ցանկանում հրաժարվել հարևանների նկատմամբ իր սպառնալիքներից»,-տեղեկացնում է Ամերիկայի Ձայնը: