Այսօր Սերգեյ Աղաջանյանի ծննդյան օրն է

Այսօր հանրահայտ հայ կոմպոզիտոր, ջութակահար, պրոֆեսոր, Հայաստանի արվեստի վաստակավոր գործիչ, Պրոկոֆևի անվան միջազգային մրցույթի դափնեկիր, հայ դասական երաժշտության վառ ներկայացուցիչ Սերգեյ Աղաջանյանի ծննդյան օրն է։

 Աղաջանյանը ծնվել է 1929թ. Պեխլևիում։ Հայտնի երաժիշտ Աշոտ Պատմագրյանի առաջարկով Աղաջանյանն ընդունվել և ավարտել է Թեհրանի պետական կոնսերվատորիան՝ Սերգեյ Խուցիևի ջութակի դասարանը: 1950-ին հանդես է եկել մենահամերգով և Թեհրանում առաջին անգամ կատարել է Արամ Խաչատրյանի «Ջութակի կոնցերտը»:

Աղաջանյանի ստեղծագործությունները բազմաժանր են՝ վոկալ գործեր, գործեր կամերային նվագախմբի համար, կամերային նվագախմբի պոլիմոնոդիաներ, բազմաթիվ խմբերգային գործեր, սոնատներ ջութակի, թավջութակի, դաշնամուրի համար, խմբերգային կանտատա սինֆոնիկ նվագախմբի համար և այլն:

1983թ.-ին ստացել է դոցենտի, իսկ 1987-ին՝ պրոֆեսորի կոչում: 1985 թվականին Աղաջանյանը ստացել է Հայաստանի վաստակավոր գործչի կոչում: 1999թ. Սանկտ-Պետերբուրգում Աղաջանյանի՝ թավջութակի համար գրված «Մենախոսություն» սոնատ-ֆանտազիան արժանացել է Պրակոֆևի անվան 3-րդ միջազգային մրցույթի 1-ին մրցանակին:

Վաստակավոր երաժիշտը մահացել է  2005 թվականի հունվարի 9-ին Երևանում։