Ադրբեջանում հայասպանությունը դե ֆակտո հանցանք չէ...

ԱՄՆ Կոլումբիայի համալսարանի հայ ուսանողները ՄԱԿ-ի գլխավոր քարտուղար Բան Կի Մունին նամակ են գրել` պահանջելով հրատապ քայլեր ձեռնարկել և դատապարտել Ռամիլ Սաֆարովին արտահանձնելու եւ ներում շնորհելու Հունգարիայի ու Ադրբեջանի քայլերը:

«Մենք՝ Կոլումբիայի համալսարանի հայ հասարակությունը, Ձեզ ենք դիմում՝ խնդրելով արձագանքել վերջերս տեղի ունեցած ահավոր իրադարձություններին՝ ադրբեջանցի հայասպանին Ադրբեջան տեղափոխելուն եւ այնտեղ նրան ազատ արձակելուն:

Նմանատիպ ակնհայտ արհամարհանքը հայերի նկատմամբ ապշեցնող է, եւ Իլհամ Ալիեւի կողմից Ռամիլ Սաֆարովին ներում շնորհելն ու նրան մեծարելը՝ որպես ազգային հերոսի, խթանում է հետագա հայատյաց, ռասիստական քաղաքականությունը եւ, դժբախտաբար, խորացնում երկու երկրների միջեւ անջրպետը: Դա հստակ ապացույցն է այն բանի, որ Ադրբեջանում հայասպանությունը «դե ֆակտո» հանցանք չէ, եւ դա խոչընդոտում է ԼՂ հակամարտության կարգավորման գործընթացին:

Մենք զարմացած ենք Հունգարիայի անսպասելի որոշումից՝ քաջալերել Ալիեւի վարչակազմի քաղաքականությանը եւ Սաֆարովին հանձնել Ադրբեջանին:

Մենք պնդում ենք, որպեսզի Ձերդ գերազանցությունը հրատապ քայլեր ձեռնարկի եւ դատապարտի Հունգարիայի եւ Ադրբեջանի արարքները:

Այս իրադարձությունը անպատասխան թողնելը կարող է ճակատագրական լինել հայերի համար ամբողջ աշխարհում եւ կարող է խախտվել ՄԱԿ-ի մարդու իրավունքների հռչակագրով սահմանված ապրելու իրավունքը»: