ՌԴ ԱԳՆ. Սիրիական ընդդիմությունը ոչնչով չի տարբերվում Ալ-Քաիդայից

ՌԴ ԱԳՆ-ն իր խորին անհանգստությունն է արտահայտել Սիրիայի ազատ բանակի՝ Հալեպի և Դամասկոսի օդանավակայաններում քաղաքացիական ինքնաթիռները ոչնչացնելու պատրաստակամության կապակցությամբ, հաղորդում է Lenta.ru-ն՝ հղում անելով ԱԳՆ մամլո ծառայությանը։

ԱԳՆ-ն նշել է, որ սիրիական ընդդիմության նմանատիպ սպառնալիքները «բացարձակապես անընդունելի» են և հակասում են միջազգային իրավունքի նորմերին:

«Դատելով բարոյական և իրավական տեսանկյուններից՝ կարելի է ենթադրել, որ ընդդիմությունը մոտենում է «կարմիր գծին», որից այն կողմ հաջորդում են քայլեր, որոնք ոչնչով չեն տարբերվում Ալ-Քաիդայի ոճրագործություններից», -ասվում է հաղորդագրության մեջ։

Հիշեցնենք, որ սեպտեմբերի 1-ին Սիրիայի ազատ բանակը հայտարարեց, թե պատրաստվում է ռմբակոծել քաղաքացիական ինքաթիռները՝ տալով իշխանություններին 72 ժամ՝ թռիչքները դադարեցնելու համար։

Ապստամբները պարզաբանել են իրենց որոշումն այնպես, որ իրենց խոսքերով՝ Բաշար Ասադն օգտագործում է քաղաքացիական ավիացիան ապօրինի զենքեր տեղափոխելու նպատակով։