Բողոքի ցույցեր Հունաստանում Հունգարիայի ներկայացուցչությունների դեմ. (ֆոտոշարք)

Սեպտեմբերի 5–ին Հունաստանի Աթենք և Սալոնիկ քաղաքներում բողոքի ցույցեր տեղի ունեցան, որոնցով հունահայ համայնքը դատապարտում էր Հունգարիայի կառավարության կողմից Ռամիլ Սաֆարովին Ադրբեջանին հանձնելու որոշումը։ ժամը 1-ին բողոքի ակցիայի մասնակիցները Սալոնիկի Ս. Աստվածածին եկեղեցու մոտից շարժվեցին Հունգարիայի հյուպատոսարանի մոտ և հյուպատոսի ներկայացուցչին հուշագիր հանձնեցին։ Բողոքի ակցիան կազմակերպվել էր ՀՅԴ Հայ Դատի հանձնախմբի կողմից։

Երեկոյան հայ համայնքը բողոքի ցույց էր կազմակերպել մայրաքաղաք Աթենքում։ Ցույցի մասնակիցները հավաքվել են Վասիլիսիս Սոֆիաս կենտրրոնական պողոտայում։ Աթենքում տեղի ունեցած ցույցը գլխավորել են Լեռնային Ղարաբաղի Հանրապետությունից Հունաստան ժամանած 22 երիտասարդներ, ովքեր նաև բարձրացրել են Արցախի դրոշը։

Ցուցարարները կանգ են առել Հունգարիայի դեսպանատան առջև՝ մնալով ոստիկանության հսկողության տակ։ Կարճ խորհրդակցությունից հետո դեսպանության մուտքին է մոտեցել դեսպանի խորհրդականը, ով ընդունել է եռանդամ պատվիրակությանը։

Հայկական պատվիրակության անդամները դեսպանի խորհրդականին են հանձնել բողոքի հուշագիր՝ միաժամանակ ներկայացնելով համայն հայության ընդվզումն ու զայրույթը Հունգարիայի կառավարության՝ հայ սպա Գուրգեն Մարգարյանին սպանած ոճրագործ Ռամիլ Սաֆարովին Ադրբեջանին հանձնելու որոշման դեմ:

Հունգարացի պաշտոնակատարը հայ ցուցարարներին հավաստիացրել է, որ թե՛ Աթենքից, թե՛ Սալոնիկից հնչած բողոքի ձայները կհասնեն Բուդապեշտի իշխանություններին և որ ինքը ստանձնում է հուշագիրը Հունգարիայի պատկան մարմիններին հանձնելու պարտավորվածություն։

{gallery}hunastan{/gallery}