Բողոքի ցույց Հոլիվուդում Հունգարիայի և Ադրբեջանի հյուպատոսությունների առջև

«Հայ երիտասարդական դաշինքի» և «Միավորված երիտասարդ հայերի» շուրջ 400 ներկայացուցիչ բողոքի ակցիա են անցկացրել Հոլիվուդում Հունգարիայի հյուպատոսության դիմաց' իրենց բողոքն արտահայտելով առ այն, որ Հունգարիան Ադրբեջանին է արտահանձնել հայ սպա Գուրգեն Մարգարյանին կացնահարած Ադրբեջանի քաղաքացի Ռամիլ Սաֆարովին: Այս մասին հաղորդում է Glendale News Press-ը:

Բողոքի ակցիա է անցկացվել նաև Հոլիվուդում Ադրբեջանի հյուպատոսության դիմաց: Ակցիայի մասնակիցները կշտամբանք են հայտնել Սաֆարովին ազատ արձակելու և ներում շնորհելու համար: Լոսանջելեսահայերը սպանված սպայի համար արդարություն են պահանջել:

Հայ դատի հանձնախմբի արևմտյան շրջանի գործադիր տնօրեն Վիլյամ Բայրամյանը հայտնել է, որ մարդասպանին հերոսացնող Ադրբեջանը ցույց է տվել իրական դեմքը:

«Հունգարիան պետք է ներողություն խնդրի նրան արտահանձնելու որոշման համար և պետք է Ադրբեջանից պահանջի, որ հանցագործին բանտ ուղարկեն»,- ասել նա:

«Դա հիմար որոշում էր: Սա նշանակում է, որ հնարավոր չէ սեղանի շուրջ նստել և բանակցել մի երկրի նախագահի հետ, որը պարգևատրում և մեծարում է ահաբեկիչներին»,- ասել է Գլենդելի փաստաբան Անժելա Բարսեղյանը:

Ցույցին մասնակցել է նաև Լոս Անջելեսի քաղաքային խորհրդի անդամ Փոլ Գրիգորյանը և Գլենդելի համայնքային դպրոցի պատմության պրոֆեսոր Լևոն Մարաշլյանը:

Հիշեցնենք, որ 2004 թվականի փետրվարի 19-ին Բուդապեշտում ադրբեջանցի ոճրագործ սպա Ռամիլ Սաֆարովը կացնահարեց Հայաստանի ԶՈւ սպա Գուրգեն Մարգարյանին քնած ժամանակ: Սպաները Հունգարիայի մայրաքաղաքում մասնակցում էին անգլերեն լեզվի դասընթացներին ՆԱՏՕ-ի «Գործընկերություն հանուն խաղաղության» (Peace for Partnership) ծրագրի շրջանակներում: Հունգարիայի դատարանը դատապարտեց Ռամիլ Սաֆարովին ցմահ բանտարկության առանց ներման իրավունքի առաջին 30 տարիներին: Ադրբեջանի «հերոս» ճանաչված մարդասպանն արժանացել է նաև մայորի կոչման, բնակարանի ու նյութական փոխհատուցման: