Մեդվեդևը կոչ է արել ազատել Pussy Riot պանկ խմբի անդամներին

Ռուսաստանի վարչապետ Դմիտրի Մեդվեդևը կարծում է, որ Pussy Riot պանկ խմբի կողմից Մոսկվայի Քրիստոս Ամենափրկիչ եկեղեցում ակցիա կազմակերպելու համար երկու տարի ազատազրկման դատապարտված երեք անդամները արդեն կրել են բավարար պատիժ և նրանց կբավարարի նաև պայմանական ազատազրկման ժամկետը։ Աղջիկների փաստաբանները կասկածում են, որ վարչապետի կարծիքը կազդի դատավճռի վրա:

«Բանտի պայմաններում կալանքի երկարաձգումն այս դեպքում, կարծում եմ, անարդյունավետ է: Իմ կարծիով, բավարար կլինի պայմանական պատիժը՝ հաշվի առնելով այն ժամանակահատվածը, որը աղջիկները անց են կացրել կալանքի տակ», - հայտարարել է Մեդվեդևը Պենզայում «Եդինայա Ռոսիա» կուսակցության ակտիվիստների հետ հանդիպման ժամանակ։

Միևնույն ժամանակ կառավարության ղեկավարը նշել է, որ բացասական է գնահատում աղջիկների պահվածքը Մոսկվայի Քրիստոս Ամենափրկիչ եկեղեցում։

«Գուցե ոչ այնքան պառլամենտական լեզվով խոսեմ, բայց իմ սիրտը ուղղակի խառնում է նրանց արարքից, արտաքին տեսքից և այն հիսթերիայից, որով ուղեկցվում է տեղի ունեցածը։ Ինձ ուղղակի տհաճ է խոսել այս ամենի մասին», - նշել է Մեդվեդևը։ Նա նաև ընդգծել է, որ առաջին անգամ է իր վերաբերմունքը հայտնում այս «հայտնի և բավականին տխուր պատմության» վերաբերյալ։