Հրանուշ Հակոբյանն ընդունեց Հայկական առևտրային ցանցի նախագահին

Սեպտեմբերի 18-ին ՀՀ սփյուռքի նախարար Հրանուշ Հակոբյանն ընդունեց Հայկական առևտրային ցանցի նախագահ Վահրամ Փիրջանյանին: Վ. Փիրջանյանը եկել էր նախարարին ներկայացնելու սույն թվականի հոկտեմբերի 6-8-ը Փարիզում կայանալիք Հայկական առևտրային ցանցի Երկրորդ գլխավոր համաժողովը և մասնակցության հրավեր անելու: Փիրիջանյանի ներկայացմամբ վեհաժողովը միտված է հայկական առևտրային ցանցի և աշխարհի հայ գործարարների համար մի շարք կարևոր հիմնախնդիրների առաջադրմանը և լուծմանը: Ակնկալվում է համապատասխան ծրագրի ներկայացում, որի շնորհիվ հնարավոր կլինի տարբեր երկրներում նոր հայ համայնքների ներգրավմամբ ընդլայնել հայկական առևտրային ցանցը, կստեղծվի հայկական բիզնես միջավայրը ներկայացնող տեղեկատվական կայք:

Նախարարը բարձր գնահատեց համաժողովի անցկացման գաղափարը և հույս հայտնեց, որ Հայկական առևտրային ցանցի հետ համատեղ կառաջարկվեն կառուցողական մոտեցումներ, որոնք Հայաստանը ներդրումների համար առավել նպաստավոր երկիր կդարձնեն: